En la fracziun Tarasp – che tutga tar la vischnanca da Scuol – manca in lieu d’inscunter. L’ultim’ustaria è serrada dapi plirs onns. Cumprar en mangiativas e rauba dal mintgadi è dentant pussaivel enfin oz. La butia Tarasp cumbatta però per il surviver. Per render pli attractiva la spierta, vul la societad «Butia Tarasp» cumplettar la butia existenta cun in café pli grond.
Butia sco lieu d’inscunter
Actualmain consista la butia d'in fanestrigl da la posta e d’infurmaziun turistica. Dapi in per mais datti era duas maisas ed ina maschina da cafè. Las maisas sajan adina puspè bain occupadas ed en l'avegnir veglian ins porscher in café per var 20 persunas, di Riet Fanzun, commember da la gruppa da project Cafè-Butia Tarasp.
-
Bild 1 von 3Legenda: La butia Tarasp duai vegnir cumplettada cun in café. RTR -
Bild 2 von 3Legenda: Actualmain sa chattan duas maisas en la butia Tarasp. Riet Fanzun
-
Bild 3 von 3Legenda: En l'avegnir duai dar in café per radund 20 persunas. Riet Fanzun
Sustegn finanzial
Per realisar il project vegnia fatg quint cun custs totals da var 80’000 francs. Quels veglian ins ramassar cun donaziuns privatas. Tenor Riet Fanzun sustegna la vischnanca il project cun var 50’000 francs e vegnia er encunter cun il fit da las localitads ch’èn en possess da la vischnanca. La finamira saja da cumenzar cun las lavurs l’atun da quest onn e ch’ins possia suenter porscher in nov lieu d’inscunter per in e mintgin a Tarasp.