San Murezzan – cun ses bun 5’000 abitants ed abitantas – è en congual cun autras citads svizras plitost pitschnas. Tge che pertutga las finanzas, po la vischnanca sa cumparegliar cun citads pli grondas. Mintg’onn subvenziunescha San Murezzan participaziuns vi d'interpresas impurtantas per la maun public cun 13.5 milliuns francs. La valur en ils cudeschs: 43 milliuns francs.
Co ir enturn cun ils raps?
Las participaziuns tanschan d'engaschaments gronds – sco quels per las pendicularas, l'Engadin St. Moritz Mountain SA – fin tar fitg pitschnas sco quella da l’Academia Engiadina a Samedan. La cumissiun da la suprastanza communala, enturn il president communal da San Murezzan Christian Jott Jenny, è sa messa a la tschertga d’ina resposta per la dumonda: Co professiunalisar ed organisar las structuras communalas uschia ch'ils interess publics da la vischnanca da San Murezzan pon vegnir accumplis e controllads?
-
Bild 1 von 2. Christian Jott Jenny. President communal da San Murezzan. Bildquelle: RTR.
-
Bild 2 von 2. Christoph Wenk. Expert da la Trusted Board Advisors SA ch'ha gidà d'elavurar las directivas. Bildquelle: RTR.
Dar in rom per la controlla d'investiziuns
La soluziun che la cumissiun ha preschentà durant la sesida la fin mars al parlament da San Murezzan: Directivas ch'han la finamira da pudair trametter experts u persunas da la professiun dumandada en ils gremis da las participaziuns communalas empè da suprastants u suprastantas communalas. Sin quella moda duai vegnir professiunalisà il manar da las participaziuns da la vischnanca. Plinavant duai la transparenza dals rapports envers l’administraziun communala ed er il public s'augmentar. Quellas mesiras duain er impedir in sfarlattim da daners publics.
Uss duai il parlament da San Murezzan tractar e discutar midaments pussibels vi da questas directivas.