Suenter quatter onns temp da construcziun han las trais vischnancas purtadras – Segl, Silvaplauna e San Murezzan – envidà la populaziun ad in di da las portas avertas en la nova chasa da tgira «Du Lac» amez San Murezzan. In project ch’ha custà radund 60 milliuns francs. Cun ina festa per giuven e vegl, pleds festivs e accumpagnament musical dal Trio Steidle e Toni Vescoli, è la chasa da tgira Du Lac sin 5 auzadas vegnida inaugurada uffizialmain.
Igl è la segunda chasa da tgira en l'Engiadin’Ota. Quella da Promulins a Samedan era enfin ussa l’unica dimora per persunas attempadas ch’han basegn da tgira. Tuttas duas chasas da tgira, che porschan ensemen 120 plazzas, vegnan gestiunadas sur la Fundaziun provediment da sanadad Engiadin’Ota (SGO).
Grond interess per stanzas ed abitaziuns
Enturn 1'000 persunas han prendì la chaschun da vesair las novas localitads cun dominanza da blera glisch, construcziun en lain e betun. En tut porscha la chasa da tgira a San Murezzan plazza per 60 persunas. Integrà en il project èn sper las stanzas per ina persuna, era 17 abitaziuns per senioras e seniors.
Las reacziuns da visitadras e visitaders da l'entira Engiadina èn stadas ordvart positivas. Surtut il fatg che la chasa da tgira sa chatta amez il vitg da San Murezzan, ed ha per part vista sin il Lai da San Murezzan, ha persvadì la glieud.
Cumenzament november: Ils emprims abitants pon vegnir
24 persunas vegnan ad esser ils emprims abitants dal «Du Lac» a partir dal november. Sco quai che la manadra da las duas chasas da tgira Promulins a Samedan e Du Lac a San Murezzan, Gabriela Busslinger, ha declerà, possian ins avrir en in emprim pass ina auzada. Quai dependia dal persunal da tgira avant maun. Anc adina vegnia tschertgà intensivamain persunal. L’interess da senioras e seniors che vulessan dentant far midada en la chasa, quel saja grond, uschia Busslinger.
Regal musical: In clavazin a cua
A chaschun da l’avertura è er vegnì preschentà in regal che l’anteriur reverenda da San Murezzan, Brent Fisher, ha fatg als futurs abitants dal Du Lac. El ch’abita entant en l'Italia ha regalà a la chasa da tgira ses vegl clavazin a cua. Il transport sur cunfin dal clavazin cun tastas d’ivur saja stà pretensius. Uschia ha Fisher transportà las tastas demontadas cun sia bulscha en Svizra.