Il post da cussegliaziun vegliadetgna e sanadad Engiadin’Ota ha envidà ensemen cun l’uniun chantunala da senioras e seniors ad ina discussiun da podium a San Murezzan. Il tema «mort sin empustaziun» han expertas ed experts discutà e circumscrit en la sala da l’Hotel Laudinella a San Murezzan. Che la tematica è d’interess ed er relevanta, è vegnì cumprovà cun ina sala emplenida cun passa 200 persunas.
Communicaziun è tut
Il pli impurtant insumma saja da discurrer sur dal tema ed er ils giavischs e las aspectativas ch’ins ha en connex cun la fin da la vita. Quai han suttastritgà tut ils participants e participantas da la discussiun. Da la partida eran sper persunas da la tgira medicinala e palliativa in reverenda, in medi da chasa, ina cussegliera naziunala, sco er in assistent da l’organisaziun Exit. Quella quinta actualmain 180’000 commembras e commembers.
Jau discur cun mia famiglia avertamain sur da la mort e quai che jau ma giavischass per exempel en il cas d’in grev accident. Da communitgar quai è anc bler pli impurtant che d’avair scrit in testament vital, in'uschènumnada Patientenverfügung.
Svizra cun tenuta liberala
L'accumpagnament al suicidi en Svizra signifitga il sustegn d'umans che pateschan grevamain u ch'èn muribunds tar il suicid, il pli savens da las organisaziuns sco Exit. La Svizra ha ina tenuta liberala en connex cun l'accumpagnament da suicidis assistids. L'assistenza da suicidi activa, tar il qual ina terza persuna dat in med che maina a la mort, è scumandada qua. En quest cas discurr'ins d'in mazzament intenziunà.
Il Cussegl federal ha decidì il 2011 da desister d’ina regulaziun explicita da l’agid da suicid en il dretg penal. Dentant duain la prevenziun da suicid e la tgira palliativa vegnir promovidas.
Quai vul dir che l’assistenza tar in suicid, uschia sco ch’ella vegn prestada dad organisaziuns sco Exit, n’è cun quai betg scumandada.
Sch’ina persuna tscherna insumma la via da sortir da la vita e co, haja mintgin e mintgina da decider per sasez. Impurtant saja che la persuna è clera en il tgau tar questas decisiuns. En il cas ideal: uschè baud sco pussibel.