Durant las proximas emnas duai avair lieu l'emprim suicidi en la capsla da mort dispitaivla «Sarco». Sco lieu ha l'inventader australian da l'apparat, Philip Nitschke, tschernì la Svizra. La capsla s'emplenescha cun smatgar sin il buttun cun nitrogen. La persuna ch'è pronta da murir, mora dad ina mancanza d'oxigen. L'inventader sa basa sin in'expertisa d'in professer da Son Gagl ch’è vegnì avant onns a la conclusiun che «Sarco» n'haja betg cuntrafatg a la lescha.
Il spagat tranter la legalitad e l'illegalitad tar l'assistenza al suicidi è stretg.
Il spagat tranter la legalitad e l'illegalitad tar l'assistenza da suicid saja fitg stretg, di Kerstin Noëlle Vokinger. La professuressa per dretg e medischina a l'Universitad da Turitg accentuescha che las circumstanzas exactas da la realisaziun na sajan betg enconuschentas e ch'ellas possian tut tenor diever avair consequenzas dal dretg penal e disciplinar u era dal dretg da products medicinals.
«Sarco» – in product medicinal?
Tenor Vokinger stuess vegnir sclerì en detagl spezialmain sche «Sarco» stoppia vegnir qualifitgà sco product medicinal u betg. Pertge che sut ils products medicinals na tutgan betg be quels che portan levgiament u tractan ils pazients, mabain er tals che pon midar in process patologic tar ils pazients.
Sch'i vegniss affirmà ch'i sa tracta d'in product medicinal, vegnissan applitgadas las prescripziuns da la lescha davart ils medicaments e da l'ordinaziun correspundenta. En quest cas valessan disposiziuns spezialas per l'applicaziun e l'import da quest product en Svizra, medemamain la surveglianza dal product tras Swissmedic, l'institut svizzer per products terapeutics.
Nagin accumpagnament dal medi sco novitad
«Las circumstanzas dal tuttafatg concretas co che la capsla duess vegnir duvrada n'èn almain anc betg enconuschentas a mai», constatescha l'experta giuridica Vokinger. Ina differenza remartgabla vers l'assistenza fin qua al suicidi cun il med Pentobarbital saja, che las persunas che vulan murir sajan vegnidas accumpagnadas dal medi ed er las directivas medicinal-eticas èn vegnidas resguardadas. La visiun da «Sarco» perencunter saja che tut funcziunia senza avair accumpagnament d'in medi. Era vegnia cun il nitrogen duvrada in'autra materia.
Betg sco ultim stoppia vegnir sclerì penalmain, sch'insatgi saja vegnì surmanà da far suicidi per motivs egoistics, constatescha Vokinger en vista a consequenzas eventualas per l'inventader da la capsla. Tut tenor sch'ils medis sajan involvids stoppia ultra da quai era vegnir examinà il dretg professiunal.
Sche la capsla dastga vegnir applitgada n'è damai giuridicamain betg cler. Tenor in rapport actual dal «Blick» smanatschan ils emprims chantuns il gestiunari da la capsla cun consequenzas giuridicas.
