En Svizra han l'onn passà 1'252 persunas fatg diever dal suicidi assistì cun agid da l'organisaziun Exit. Quai sajan 11% dapli ch'anc il 2022, sco quai che Exit communitgescha.
La raschun per l'augment dal suicidi assistì saja tranter auter la societad che vegnia adina pli veglia cun malsognas u impediments grevs. Uschia è la vegliadetgna mediastada tar las dunnas tar 80,7 onns e tar ils umens tar 79 onns. Trais quarts da tut ils cass han tenor Exit gì lieu en conturns privats, prest in 5avel en chasas da tgira e da vegls.
In terz pateva da cancer
Passa 30% da las persunas che sajan sa decididas per il suicidi assistì, patevian da cancer. Era adina dapli glieud cun plirs mals è sa decidida per la mort tenor atgna voluntad. Sco gia l’onn passà èn dapli dunnas (759) sa decidì per il suicidi assistì che umens (493).
Oragnisaziun dumbra dapli commembers
L'organisaziun per l'assistenza al suicidi dumbra ultra da quai bunamain 20'000 commembers novs. Per la fin da l'onn passà haja l'uniun Exit Deutsche Schweiz dumbrà 167'631 commembers, ha l'uniun Exit Deutsche Schweiz communitgà gievgia. Quai sajan 19'679 persunas dapli che anc l'onn avant. Sper la mort accumpagnada hajan era 92'000 commembers fatg diever da l'offerta da deponer lur disposiziun da pazients.
