In tema che muventa - Cumià e cuminanza

In tema che muventa persunalmain

Jau sun ina da quellas – sco blers auters bain era – che legia adina sco emprim las annunzias da morts en las gasettas. Ed jau hai constatà ils davos onns ch’i dat pli e pli paucas sepulturas e sch'i dat ellas han quellas lieu mo en il stretg ravugl da la famiglia. La cuminanza vegn sclausa.

A Surrein nua che jau sun creschida si vegnivan quests usits da prender cumià vivids fitg. Jau ma regord che mes conscolars ed jau gievan a messa da bara ni ch’jau gieva cun la mamma en stiva dal defunct a dir paternoss. Quai era normal.

Oz percorsch jau che jau sun daventada malsegira quai che pertutga ir enturn cun cumiads. Ins na sa betg propi co sa cumportar. A tgi èsi da condolar sche jau vom a sepultura? E sche jau ves en il vitg ina persuna en malencurada, duai condolar u betg? Ils rituals che dattan segirezza mancan ozendi.

Inventari dals rituals

Quest tema fatschenta mai. Avant sis onns hai jau perquai gì l’idea da documentar usits e rituals da prender cumià da cuminanza ch’existan anc oz. Sco emprim hai jau contactà tut las plaivs rumantschas en il Grischun. Jau hai fatg ina sort inventari dals usits e rituals ch’existan anc oz. Lura hai jau visità differentas plaivs che vegnissan en dumonda. Da la vart da las plaivs e da la baselgia è mia idea stada bainvisa. Dapertut è il resun stà: Fai quest film! Mo la finala èsi la famiglia dal defunct che decida schebain ella lascha filmar la sepultura u betg.

Duvrà curaschi

Da contactar la famiglia en malencurada è stà ina sfida. En ina tala situaziun pari freh da telefonar e dumandar per dastgar filmar.

Jau hai duvrà curaschi, e savens hai jau stuì sfurzar mamezza da telefonar a las famiglias en malencurada. Era da lur vart è l’idea da documentar quests usits e rituals che svaneschan zic a zic stada bainvisa. Ma ils blers han tuttina betg vulì laschar filmar.

Pass per pass

Pliras giadas hai jau mess da la vart il project sepultura. E tuttina, insaco n'ha questa idea betg laschà liber mai. Adina puspè cura che jau raquintava da mia idea ha la glieud cumenzà a raquintar istorgias persunalas.

Jau hai percurschì uschè fitg che quai tema occupa betg mo mai mabain era massa auters. E quai è stada la motivaziun da tuttina betg laschar crudar il tema. A l’entschatta è stada l’idea da filmar en in sulet lieu ina sepultura da l’entschatta enfin la fin. Bainprest hai jau constatà che quai è nunpussaivel. La finala èsi reussì da far pass per pass. Da rimnar zic per zic en differents lieus.

In document dal temp

Questas singulas parts en differents lieus documenteschan usits e rituals da prender cumià da cuminanza sco els existan anc oz. Igl è in document dal temp per nus ma era per las generaziuns che vegnan suenter. Grazia a l’avertezza da las famiglias en malencurada e grazia d'avair tegnì la dira è quai la finala reussi.