Gia dapi decennis datti emprovas da meglierar la situaziun da traffic a Santa Maria en la vischnanca da Val Müstair. Durant la stad è la via stretga tras vischnanca emplenida cun bler traffic. Uschè bler traffic, ch’ins ha da reglar quel durant quest temp. Per chattar ina soluziun ha il chantun Grischun uss fatg ina procedura da participaziun per in sviament.
La varianta nord vegn preferida
Duas variantas èn en discussiun: Tuttas duas cun tunnels, ch'avessan da sviar la vischnanca. La varianta nord prevesa custs da circa 55 milliuns francs e la varianta sid prevesa custs da bundant 84.5 milliuns francs. Il chantun Grischun preferescha la varianta nord. Quella prevesa da sviar il traffic che passa dal Pass dal Fuorn en il Tirol dal Sid. Questa varianta para dad esser la pli palpabla. Però questa varianta na cumpiglia betg la via dal Pass d’Umbrail che maina en vischnanca e quai na plascha betg a tuttas en tuts en la val.
Ponderar sche il Pass d’Umbrail pudess era esser part dal sviament
Ils abitants e las abitantas da Santa Maria chattan ch’ins duai uss ponderar, sch'ins vul era includer la via dal Pass d’Umbrail en il sviament. Els ed ellas teman numnadamain, che la situaziun da traffic en vischnanca durant la stad na sa midia betg significantamain. Perquai han els ed ellas tschernì da far part a la procedura da participaziun. Circa 120 persunas han suttascrit la charta als uffizis. Tenor Remo Salvett è l’interess fitg grond en la vischnanca. Per el na vai cun questa acziun betg per esser cunter la varianta nord dal sviament da Santa Maria mabain per dir l’opiniun davart quest project.
