Cun ina brev averta pretendan blers abitants ed abitantas da Sta. Maria en Val Müstair ch'il chantun fetschia vinavant cun il sviament dal vitg. Il parlament a Berna ed il Cussegl federal hajan sustegnì ina moziun che vul ch'ils interess publics da vischnancas e chantuns hajan la medema paisa sco l'interess naziunal vi d'in maletg dal lieu. I va per midar las reglas – quanta paisa ch'in maletg dal lieu duai aviar. Perquai pretenda la brev averta, cun 180 suttascripziuns ch'il chantun instradeschia uschè spert sco pussaivel l'exposiziun publica dal project da sviament da Sta. Maria. Che la situaziun da traffic a Sta. Maria na saja betg supportabla, saja enconuschent, ha punctuà in dals abitants ed abitantas che han scrit la brev averta, Alain Moroni. La moziun portia uss novas pussaivladads.
Grazia a quella moziun avain nus uss dapli pussaivladads e dapli squitsch sin las autoritads federalas.
Ins possia bain anc optimar il project per il sviament er or da vista dal maletg dal vitg, ma els veglian uss en emprima lingia ch'ins lavuria cun prioritad vi d'in cumpromiss.
La cussegliera guvernativa responsabla Carmelia Maissen n'ha gievgia betg prendì posiziun en detagl. Ella conferma dentant envers RTR ch'ella haja survegnì la brev e che ella speria, sco la populaziun, ch'i saja uss pli simpel da realisar in sviament.
Cussegl federal sto far il proxim pass
La moziun è ussa surdada al Cussegl federal. Lez ha l'incumbensa da preschentar al parlament in messadi per l'adattaziun da la lescha davart la protecziun da la natira e da la patria. Las reglas pertutgant ils inventaris d'objects duain vegnir adattadas, uschia ch'ins possia divergiar da l'absoluta protecziun dals objects, tar ina dumonda chantunala u communala – e ch'ins possia lubir ina midada ch'è en l'interess public – suenter avair examinà ils interess da protecziun sco er ils interess publics.
L'idea d'in sviament per Sta. Maria è veglia – in sguard en l'archiv: