Sco en blers auters ospitals en Svizra saja la forsch tranter custs ed entradas sa schlargiada fermamain. Ils custs èn creschids marcantamain, las entradas èn pli bassas. Quai haja manà ad ina gronda perdita da 5 milliuns francs en il quint annual da l’Ospital regiunal Samedan, di il president dal cussegl administrativ da l’organisaziun SGO, Gian A. Melcher envers RTR.
Las cifras cotschnas la fin dal 2023 resultan causa motivs multifars, sco ils pretschs d’energia ch’èn creschids, la situaziun sin il martgà da persunal qualifitgà, ma er las amortisaziuns en connex cun la sanaziun cumpletta da l’ospital, paisan.
Il cussegl da fundaziun da la SGO – la Fundaziun Provediment da sanadad Engiadin’Ota – dumonda perquai per in credit supplementar a las 11 vischnancas. Quellas duain decider en chaussa fin la fin da zercladur 2024. Parallel vegnian ils gremis ad evaluar ed examinar fin la fin da quest onn la strategia e la purschida da prestaziun che l’ospital regiunal duai avair en avegnir.
Pli pitschen l’ospital e pli gronda sia purschida, pli impurtanta è la sfida da pudair finanziar tut.
Senza sustegn na vai betg enavant
Il provediment da sanadad, che consista da l’ospital, ils dus centers da vegliadetgna e la Spitex sut in tetg, correspundia a la strategia dal chantun Grischun. Be cun entradas tras las taxas da tariffa, na dumogn ins dentant mai a finanziar questa purschida, suttastritga il president da la fundaziun, Christian Brantschen.
Quest agid finanzial intermediar dovri per segirar la gestiun da l’ospital a Samedan. Senza quel daventass la liquiditad in problem e periclitass severamain da cuntinuar cun la gestiun.
Parallel cun la dumonda a las vischnancas, hajan ils gremis da la SGO entant er gia instradà in’examinaziun per evaluar ina strategia per la purschida da l’ospital regiunal a Samedan. Fin la fin da quest onn duessan ils plans esser pli concrets, uschia Christian Brantschen.
Rinforzar posiziun sco center regiunal
Surtut las lezias e duairs futurs da l’ospital duain vegnir sclerids e definids. Er pussiblas cooperaziuns cun auters ospitals vegnian analisadas a moda critica. Questa discussiun stoppia vegnir fatga cun involver la politica e la populaziun en tut las vischnancas purtadras. La situaziun saja en ina regiun turistica sco l’Engiadin’Ota anc pli spinusa, cun quai che l’ospital ha da far quint cun in potenzial da pazients e pazientas tranter 20’000 e – durant la stagiun auta – cun 100’000. La finamira saja da pudair garantir er en avegnir ina purschida optimala per la glieud indigena ed er ils giasts.
