La Fundaziun Provediment da sanadad Engiadin'Ota ha elegì dr. Susanne Stallkamp sco nova CEO. La dunna da 45 onns ha experientscha sco media ed er da manar organisaziuns da sanadad. Ella è stada media spezialista per anestesiologia e medischina intensiva ed ha studegià management per sanadad. Ella ha lavurà plirs onns en l'ospital d'universitad a Basilea ed en il center svizzer da paraplegia a Nottwil.
Dr. Susanne Stallkamp remplazza Christoph Jäggi ch'è daventà il december 2021 ad interim il manader. El mida en il cussegl d'administraziun. La surdada capita sin il cumenzament da december.
