Per meglierar il provediment da la sanadad en las regiuns vul il chantun installar dapli posts da cussegliaziun regiunals. Quai ha communitgà la regenza. Quests posts gratuits servian sco puncts da consultaziun neutrals per dumondas dal sectur da sanadad. La finamira saja da distgargiar las persunas dal fatg e da spargnar custs e resursas a lunga vista. Quai grazia ad ina cussegliaziun u ad ina triascha adequata – in uschenumnà «management da cas»: Quel correspundia al princip «ambulant avant staziunar».
Il chantun ha approvà in concept general sco basa per l'installaziun dals posts da cussegliaziun. Oravant tut il «management da cas» (per englais: «case management») duai a lunga vista spargnar daners. La finamira da questa purschida è d'identifitgar ils basegns da las singulas persunas pertutgadas e da manar quellas a las dretgas persunas.
In management da cas che funcziuna bain, sustegna il provediment da sanadad en las regiuns e meglierescha la purschida per pertutgads e pertutgadas.
Plinavant haja ina analisa da la purschida correspundenta en il chantun Glaruna mussà, ch'il sistem possia reducir custs a lunga vista. Las regiuns dal provediment da la sanadad èn responsablas per stgaffir e gestiunar la nova purschida. Ellas han era da pajar ils custs.
Prevenziun e diagnosa a temp
L'introducziun dal «management da cas» correspunda al concept da «ambulant avant staziunar». Cun agid dals posts regiunals survegn la populaziun infurmaziuns davart purschidas da sanadad, sco era or dal sectur social u tar dumondas finanzialas. Sche la situaziun è cumplexa, alura vegn instradà in «management da cas», vul dir che la situaziun vegn analisada en detagl ed il post da cussegliaziun coordinescha las purschidas e trametta la persuna pertutgada als dretgs lieus.
Blers ospitals han gia in «management da cas» intern, ch'oravant tut pazients e pazientas staziunars pon nizzegiar. La nova purschida cuntinuescha quest servetsch era suenter il temp en l'ospital.
