In tema spazi da viver per indigens è cumplex ed enorm individual – quasi en mintga vischnanca datti in in’autra situaziun. Perquai van er las ideas e las opiniuns davart las mesiras dapart.
Intgins extracts ord la discussiun
A Puntraschigna prevesan ins da chattar proximamain soluziuns per stgaffir dapli spazi per indigens, di la presidenta communala Nora Saratz-Cazin. La vischnanca ha lantschà in questiunari per chattar ora ils basegns, passa 500 persunas han prendì part a l’exposiziun da cooperaziun.
Dapi dus onns datti in grond consens da la tematica, in tscherta conscienza per la dramatica da la situaziun.
Andry Niggli, cumpossessur dad in biro d’immobiglias e secretari da l’associaziun dals proprietaris en Engiadin’Ota ha fatg l’experientscha che las abitaziuns vegnan datas a fit enorm svelt ed ils pretschs èn sut squitsch.
Jau hai empruvà da declerar nossa vista, ma i sa tracta dad in tema difficil. Quai è cler a tuts.
La societad Anna Florin ha la finamira da chattar soluziuns che valan per tut la Svizra, oravant tut vulan els vegnir activs sin il nivel politic, ma era a la populaziun vulan els infurmar sur da las consequenzas da l’iniziativa e las consequenzas da la nova lescha da planisaziun dal territori.
Tut auter che dischillus, ma constatà ch'i dat anc blera lavur en l'avegnir.
La situaziun en Val Müstair è tut autra che quella en Engiadin’Ota. En la Val Müstair datti anc spazi da viver ed era la pussaivladad da fabritgar. Els avessan anc parcellas ed era divers clavads per surfabritgar, di la presidenta communala Gabriella Binkert-Becchetti.
Mintga vischnanca sto chattar si'atgna soluziun, perquai che mintga vischnanca ha in'atgna situaziun.
Facit dal discurs
Chattà l'ov da Columbus n'han ins betg durant la discussiun tranter las duas presidentas communalas, il secretari da l’associaziun da proprietaris ed il co-president da la societad Anna Florin. Dad ina vart spetgan ins in tschert sustegn dal chantun, ma da l’autra vart ha mintga vischnanca da guardar individualmain co schliar la problematica. Gist Puntraschigna è vidlonder ad analisar soluziuns cun il questiunari. Ils resultats da quella procedura vegn pussaivlamain er ad esser in instrument da basa per autras vischnancas e regiuns.