Enfin ils 6 da favrer 2024 è la populaziun da Puntraschigna ed er ils possessurs e possessuras da segundas abitaziuns dumandadas da sa participar al questiunari da la vischnanca. I va per l’introducziun pussibla d’ina taxa directiva per segundas abitaziuns. In di avant il termin sajan sa participadas passa 500 persunas al questiunari. Tenor la chanzlista da Puntraschigna, Jeannette Guadagnini fetsch ins finalmain quint cun in resun u proposta da radund 600 persunas, quai che saja fitg bler.
Resultats vegnan anonimisads
En in proxim pass vegnia furmada ina gruppa da lavur. Quella sa duai cumponer da las differentas gruppas d’interess a Puntraschigna. Per quella gruppa èn gia s'annunziadas differentas persunas. Jeannette Guadagnini fa quint cun ina gruppa da 10-12 persunas che vegn ad evaluar ils resultats il pli baud la fin da quest mais. Quai suenter che la vischnanca ha anonimisà tut ils inputs e propostas. Ch’i sa tractia per part er da cuntra-propostas fitg concretas per la taxa directiva planisada, uschia la chanzlista da Puntraschigna.
