Dumber da chasadas in motiv principal
Per ch'il martgà d'abitaziuns en il chantun funcziuneschia stuess la purschida d'abitaziuns tegnair pass cun l'augment da las chasadas. En il Grischun è il dumber da las chasadas creschì pli fitg che la populaziun ils davos onns. Tenor il studi ha quai pliras raschuns: l'aspectativa da viver è creschida, i dat dapli stagiunaris e stagiunarias e la tendenza da vulair viver a moda individuala è creschida. En trais quarts da la chasadas abiteschan be ina enfin duas persunas. Quai è sut la media svizra. Be en 16% da las chasadas vivan quatter u dapli persunas.
Latiers vegn ch'igl è vegnì construì memia paucas abitaziuns davent dal 2019 per cuvrir la dumonda d'emprimas abitaziuns, abitaziuns da persunal ed abitaziuns da vacanzas. Quai malgrà ch'il dumber da persunas novdomiciliadas è s'augmentà e l'interess per abitaziuns da vacanzas è creschì.
Memia paucas abitaziuns vidas
In cler segn per la situaziun precara sin il martgà d'abitaziuns è il dumber d'abitaziuns vidas ed il svilup dals pretschs. Precara è la situaziun surtut tar las abitaziuns da locaziun. Il dumber total d'abitaziuns vidas cumpiglia era las abitaziuns secundaras che n'èn strusch relevantas per giuditgar il dumber d'abitaziuns vidas. Tuttina è la quota be circa tar 1%. Per ch'il martgà funcziuneschia stuess la quota dentant esser tar 1,5%.
Tenor il studi pudess la tensiun sin il martgà avair cuntanschì ses punct culminant. Igl ha puspè dà schlantsch en il Grischun ed i vegn construì dapli. Il dumber da projects da construcziun saja dentant anc adina memia pitschen per schliar a curta u a media vista la tensiun sin il martgà d'abitaziuns.
Politica duai vegnir pli activa
Sin basa da quests resultats ha il chantun decidì da prender mesiras politicas. Il chantun vul elavurar las basas per extender la promoziun chantunala d'abitaziuns. Quai cun ina revisiun da la lescha davart la construcziun d'abitaziuns socialas e la meglieraziun da las relaziuns d'abitar en il territori da muntogna. Quella duai ir en consultaziun en il decurs dal segund semester dal 2024.
