En si’exposiziun «Puter – a Global language» en la Chesa Planta a Samedan demussa il linguist Chasper Pult il svilup da l'idiom puter e sia relaziun cun autras linguas. En connex cun il giubileum dad 80 onns «Fundaziun de Planta» ha il president dal cussegl da fundaziun Chasper Pult fatg retschertgas davart l’idiom da l’Engiadin’Ota e Bravuogn e realisà in’exposiziun.
Sfida da visualisar ina lingua
La pli gronda sfida saja stada da visualisar ina lingua, uschia il linguist. Suenter lungas ponderaziuns haja el lura decis da visualisar differentas suttematicas cun exempels or da l’entir mund. Tranter auter vesa el parallelas cun il enconuschent Crap da Rosetta (Rosetta Stone). Cun quel èsi numnadamain stà pussaivel a l'entschatta dal 19avel tschientenar da decodar las ieroglifas egipzianas a maun da traducziuns grecas. Chattà connexs puters ha Chasper Pult sin l'entir il mund. Il titel «Puter – a Global Language» saja forsa er in pau surfatg, a la fin duai si’exposiziun però er divertir las visitadras ed ils visitaders, uschia Chasper Pult.
L’exposiziun pon ins visitar fin ils 21 d’october en la Chesa Planta a Samedan.