Teater senza pleds - Il spiert russ Domovoi sin la tribuna a Mustér

La producziun da l'artist russ Igor Mamlenkov – che viva dapi 14 onns en il chantun Tessin – e sia cumpagnia da teater «Domovoi» è in toc da teater senza pleds. Tuttina vegn l’actur d’emplenir dapli ch’ina ura la tribuna cun ses moviments, ma era cun requisits. El gioga cun tailas, cun stgatlas, chazzolas e cun ina scua.

Il spiert da chasa – per russ il «domovoi» – è in um cun vestgadira stgarpada, tschuffa e cun ina chapitscha ed in nas da chaun. El banduna per l’emprima giada sia chasa. Sch'ins mida chasa ha numnadamain er il spiert da chasa da far il medem. Quai è l’idea per quest toc, ha declerà Igor Mamlenkov. Naschida è l’inscenaziun durant il temp da pandemia a Mumpé Tujetsch.

La via ha manà da Mumpé Tujetsch ora en il mund

Il motiv per passentar il temp da pandemia a Mustér è che la mamma da la dunna d'Igor Mamlenkov ha ina chasa da vacanzas en il vischinadi da Mustér. El saja losch ch’il toc saja naschì en in pitschen lieu e betg en ina metropola, ma haja tuttina fatg ses viadi quasi per l’entir mund. Uschia han l’actur e sia gruppa da teater giugà il toc en l’Africa, en il Balcan, en la Russia ed en quasi mintga citad da la Svizra. Ed il viadi dal toc cuntinuescha: la gruppa da teater po sa participar al pli grond festival da teater dal mund ad Avignon, en la Frantscha. Quai saja ina gronda onur per els, ed er ina schanza da pudair preschentar lur moda da far teater, di Igor Mamlenkov.

Il public è stà rar

Deplorablamain n’han betg propi bleras persunas chattà la via en la halla Cons per guardar il toc. Per Igor Mamlenkov na fetschia betg differenza da giugar avant pauc public u bler. El haja ses program e las reacziuns dal public na possian ins en general mai vesair ordavant. Cun paucas persunas en sala possian ins giugar anc pli intensiv, declera Mamlenkov.

Ina da las spezialitads da ses gieu è ch’il public vegn integrà e che l’actur vegn en il public per giugar tschertas passaschas. Uschia è il contact tar quest teater fitg intensiv, era sch'i na vegn betg discurrì ina lingua. La vusch dal cor saja la vusch che tuts chapeschian e cun quella vegnia giugà, di Igor Mamlenkov. Ses giavisch è da pudair giugar regularmain la fin da l'onn a Mustér ed uschia far ina punt dal Tessin fin en Surselva e vinavant en sia cultura russa. Il giugar teater saja sia contribuziun per in meglier mund, di Mamlenkov.