Chalandamarz 2025 - L'enviern vegn stgatschà davent

Al Chalandamarz cun stgellas, plumpas e giaischlas emprovan ils scolars e las scolaras da stgatschar l'enviern. Spezialmain en l'Engiadina ed en il Grischun Central è il Chalandamarz in usit vivì ch'ha tut tenor vischnanca differentas reglas e spezialitads. Ma avant ch'il grond di è qua dovri preparativas dals uffants – dumandads èn tuts, dals pitschens enfin als rutinads.

Tramettai Vossas fotografias dal Chalandamarz 2025

Tge datti pli bel che fotografias ch'illustreschan l'usit da Chalandamarz che guarda or in zic auter tut tenor vischnanca? RTR rimna las fotografias dal Chalandamarz 2025 e publitgescha ellas en quest artitgel e tschertas er sin ils chanals socials. Grazia per Vossa fotografia!

Brail fa da per sai Chalandamarz dapi ils onns 50

Brail è ina pitschna fracziun da Zernez, sch’ins va da Zernez en direcziun Engiadin'Ota. Bleras chasas n'ha Brail betg ed er be stgars 100 abitantas ed abitants, ma er qua vegn festivà il Chalandamarz. Noss redactur Georg Luzzi ha sentì il puls dal Chalandamarz a Brail ed ha vulì savair, pertge ch'ils da Brail festiveschan gia il davos di da favrer l'usit.

Preparativas per il grond di a Samedan

Durant in suentermezdi organiseschan quels da l’ultim onn da scola in lavuratori. Durant quel è vegnì mussà co ch’ins ha da faudar e far rosas da Chalandamarz. Ina sfida betg be per ils pli pitschens, mabain er per ils pli vegls da mussar.

Mussà han els er als uffants da l’emprima classa co ch’ins ha da schluppar la giaischla. Da principi saja quai cun la dretga tecnica ina chaussa da trenament, dian ils experts pli vegls.

Onur per uffants da l'ultim onn d'esser patrunas e patruns

Per blers uffants è l’ultim onn da scola il punct culminant dal Chalandamarz, nua ch’els pon esser ils patruns e las patrunas da la festa. Il pli vegl scolar da la 9avla classa da Samedan po surpigliar la pli auta rolla, quella dal «sain». Sia vestgadira sumeglia ad in costum d’in paster appenzellais. Quest onn è Cháralampos Stamatakis il pli vegl ed ha cun quai la pli auta rolla a Samedan.

Il pli vegl ha l'onur da purtar il costum

Prova da Chalandamarz a Zuoz

L'isanza da la prova da Chalandamarz enconuscha sulettamain la vischnanca da Zuoz. Mintgamai duas dumengias avant il prim da mars van ils uffants – en furma da cortegi – stgellond enturn mintga bigl en vischnanca. Quel di vegnan ils uffants er gia partids en tenor la grondezza da lur stgellas per il cortegi.

Oriundamain vegniva quest’isanza pli probabel festivada per recrutar mercenaris. Vul dir ch’ins vuleva vesair tge giuvens ch’èn ferms avunda per trametter en la guerra.

Chalandamarz: pli baud ed oz

Fufragnai en temps passads. Sin nossa plattafurma nossaistorgia.ch vesais Vus co la tradiziun è vegnida celebrada pli baud.