En il Grischun pudessan ils dazis smanatschads dal president american Donald Trump tutgar cunzunt dus secturs. D'ina vart n'hajan las interpresas pitschnas e mesaunas ch'èn dependentas da l'export tenor il president da la regenza Marcus Caduff betg la pussaivladad da spustar lur producziun en l'America e stuessan uschia far quint cun effects negativs. Da l'autra vart tem'ins in tschert effect en il turissem.
Effects negativs per interpresas pitschnas e turissem
Il Grischun haja plitost interpresas cun structuras pitschnas, ch'exporteschan dentant tuttina lur products da nischa, ha ditg il president da la regenza grischuna e directur da l'economia publica Marcus Caduff. Sco mesira mitigianta pudess'ins applitgar indemnisaziuns per lavur curta.
Ins na po betg excluder ch'i vegn a dar relaschadas.
Quellas interpresas pitschnas e mesaunas vegnan a sentir «spert e direct» las consequenzas dals dazis. Quellas n'hajan era betg la pussaivladad e betg il giavisch d'expander en ils Stadis Unids. Auter che per exempel la Hamilton ch'aveva gia annunzià envers RTR da vulair transferir 100 fin 200 plazzas en ils Stadis Unids.
Il turissem vegn ad esser pertutgà dals effects «indirects». L'economia mundiala giaja en ina rezessiun. Sch'ins vesa las perditas a las bursas, muntia quai ch'i dat pli pauc entradas e pli pauc entradas munta che la glieud po viagiar pli pauc, ha Caduff declerà vinavant.
Sa focusar sin las relaziuns cun alliads entaifer l'Europa
Malgrà ch'ils giasts dals Stadis Unids sajan be sin il tschintgavel rang, saja lur part creschida fermamain ils ultims onns, ha Caduff plinavant declerà envers l'agentura da novitads Keystone-SDA. Ils pli blers giasts derivan da la Svizra (dus terzs) e da la Germania (17%). Gist en il turissem sajan ins en il Grischun bler pli dependent dals giasts europeics che dals Stadis Unids, uschia il president da la regenza vinavant. Perquai stoppian ins ussa sa focusar pli fitg sin ils alliads entaifer l'Europa. Plinavant ha Caduff avertì da betg crudar en panica pervi dals dazis smanatschads da 31 u 32% e da «commentar mintga aria chauda che vegn laschada ora da l'autra vart da l'Atlantic.»