Ils resultats principals:
- 4,05 milliardas francs valurisaziun brutta – mintga quart franc en il Grischun vegn realisà cun il turissem.
- 31,3% dals emploiads ed emploiadas en il Grischun lavuran direct u indirect per il turissem.
- 19,1 milliuns pernottaziuns e 4,7 milliuns giasts dal di vegnan mintg'onn en il chantun.
- En media vegnan mintg'onn investids 11'600 francs en mintg'abitaziun secundara en il Grischun.
Val dal Rain Grischuna è impurtanta regiun per il turissem
Cun 1,270 milliardas francs valurisaziun è la regiun Engiadina/Valladas dal sid (cun Val Müstair, Malögia e Bernina) la pli impurtanta regiun – ella realisescha in terz da l'entira valurisaziun turistica dal Grischun.
La segund pli impurtanta regiun è la Val dal Rain Grischuna – cun las parts Plaun, Landquart ed il district da la Plessur, senza Arosa e Churwalden. La valurisaziun en questa regiun vegn per 90% or da branschas ch'han be da far indirect cun il turissem – per exempel entras il commerzi a l'engrossa, il sectur da sanadad u era la branscha d'architectura ed immobiglias.
Las branschas ch'han da far direct cun il turissem, pia alloschament, gastronomia e traffic – quai cumpiglia era las pendicularas – han ina valurisaziun da radund 1,4 milliardas francs. Las pendicularas èn vegnidas analisadas sin incumbensa da las Pendicularas Grischunas – ed ils resultats èn vegnids preschentads gia il december.
43'000 emploiads ed emploiadas lavuran en in context turistic
Radund in terz da tut ils emploiads ed emploiadas en il Grischun lavuran per in'interpresa ch'ha in connex direct u indirect cun il turissem. En il chantun Vallais lavuran radund 29% (2014), ed en il Tessin radund 12% (2014) da tut las persunas per il turissem.
5,5 milliuns pernottaziuns en hotels – 19,1 milliuns en tut
Il studi mussa ch'ina gronda part da las pernottaziuns en il Grischun vegnan generadas d'autras purschidas che da l'hotellaria. Radund 43% da las pernottaziuns èn d'abitaziuns secundaras, che vegnan nizzegiadas dals possessurs u da las possessuras sezs.
Plinavant vegnan 78% da las abitaziuns secundaras be nizzegiadas dals possessurs e possessuras – pia betg dadas en locaziun. Il motiv principal è – tenor il studi – la flexibilitad da duvrar l'abitaziun cura ch'ins vul ed il giavisch d'avair ina sfera privata.
La homepage dal studi
Dapi la pandemia dovran duas giadas uschè bleras persunas las abitaziuns secundaras per homeoffice (2023: 27%) – e la tendenza mussa vinavant ensi, 36% dals possessurs pudessan imaginar da lavurar en il futur en l'atgna abitaziun.