Co far frunt a la criminalitad en connex cun la cumpra da drogas? In'incumbensa or da retschas da la PPS – ch'ha però er gì sustegn sur l'entir parlament ora, cun excepziun da la PS – ha pretendì che la regenza prendia ulteriuras mesiras per cumbatter questa criminalitad.
Tranter auter cun trair a niz meglier il rom legal existent. Tenor la regenza n'è quai strusch pussibel; il rom legal existent vegnia gia nizzegià da las autoritads chantunalas, il dretg decisiv è reglà sin plaun federal, quel na possian ins betg simplamain midar. Silmain sin la vart giuridica na possia il chantun betg far dapli che quai ch'el fetschia gia uss.
Repressiun u prevenziun
La regenza è vegnida incumbensada d'examinar e realisar las mesiras necessarias per rinforzar la «repressiun», da la strategia da quatter pitgas da la politica da drogas; sche necessari cun metter a disposiziun ulteriuras resursas persunalas.
Quellas mesiras na dastgian però betg ir a donn e cust da las autras trais pitgas, la prevenziun, la terapia e la diminuziun dal donn. E cunzunt la ballantscha tranter quellas pitgas è vegnida discutada aifer il Cussegl grond. Bain èn tuttas partidas stadas da l'avis ch'i dovra la repressiun, dentant la dumonda è stada quant fitg. Entant che la PPS è da l'avis «dapli repressiun e meglier», ha cunzunt la sanestra admonì che sulettamain metter accents sin dapli repressiun na portia nagut. La prevenziun saja gist uschè impurtanta.
A la fin ha la cuntraproposta da la regenza fatg la cursa: examinar ulteriuras mesiras da repressiun, però betg sin donn a cust da las autras mesiras da prevenziun. Quai cun 92 cunter 25 vuschs.
