Il chantun vul daventar pli digitals e quai tant pli svelt. Il Cussegl grond ha durant l’emprim di da la sessiun d’october tractà la basa legala persuenter. Il contact cun servetschs dal chantun stoppia vegnir pli simpels. Per ina communicaziun digitala cun il chantun ha questa basa legala però fin uss mancà. Cun la «Lescha davart l’administraziun digitala (LAD)» vegn quai a sa midar.
Purschidas analogas dattan da discutar
Anc survegnir documents sin palpiri? Cunzunt la dumonda quantas purschidas che duain anc vegnir furnidas a moda analoga en il futur ha chaschunà discussiuns. La regenza vuleva ch’i dettia er en il futur tuttas purschidas sin palpiri. Quai per betg laschar enavos persunas che n’èn betg uschè versadas en il mund digital. Quai na veglia era la Partida liberaldemocratica betg, ins stoppia però esser attent da betg daventar ineffizients: en la nova lescha duai sulettamain star scrit che las autoritads stoppian resguardar ils interess da quellas e quels che na nizzegian betg meds digitals, quai tanschia. Peter Peyer – il cusseglier guvernativ responsabel - ha admonì che questa formulaziun possia cuntrafar a la lescha.
Il Cussegl grond ha dentant approvà la proposta da la PLD cun 62 cunter 55 vuschs ed 1 abstenziun.
Basa per transfurmaziun digitala
La lescha ch’è vegnida tractada è la basa per la transfurmaziun digitala en l’administraziun chantunala. La discussiun areguard la digitalisaziun cuntinuescha però gia il december. Alura vegni pli concret: numnadamain co questa transfurmaziun guarda ora en detagl e tge summas ch’il Grischun less investir per la transfurmaziun. La regenza propona per quest intent 45 novas plazzas ed investiziuns da radund 35 milliuns francs.
