Simon Gredig è il candidat da la Glista libra/Verda per las elecziuns dal cussegl da la citad da Cuira. El è vegnì preschentà ad ina conferenza da medias. Gredig è deputà dal Cussegl grond e commember da la cumissiun da gestiun. El ha studegià scienzas da l'ambient a l'ETH ed è mainagestiun da Pro Velo Grischun. Temas che stattan en il center per il candidat da 30 onns èn ina citad attractiva per tut las generaziuns cun spazis verds e quiets per passentar temp, cun meglierar la situaziun da traffic en la citad cun far pli attractiv meds sco traffic public u il velo per vegnir a la lavur.
Finamira d'avair ina forza verda en il cussegl
L'ultima giada che la Glista libra/Verda è stada represchentada en il cussegl da la citad è stà durant duas legislaturas enfin il 2020 cun Tom Leibundgut. Suenter aveva Anita Mazzetta empruvà da defender quel sez, dentant senza success. Per Mazzetta ch'è presidenta da la Verda e durant onns stada la fatscha da la partida èsi stà cler ch'ella vul betg pli candidat cun 60 onns. Uss saja ura e temp per las forzas giuvnas.
Candidatas e candidats per il cussegl e presidi
Sper Simon Gredig candidescha da nov er Hanspeter Hunger da la Partida populara per in sez en il cussegl da la citad. Er per il presidi hai gia candidaturas. Uschia vulan Patrik Degiacomi (PS) e Sandra Maissen (AdC), ch'èn cussegliers da la citad da Cuira, surpigliar il timun. La Partida liberaldemocratica, che vul defender il sez dad Urs Marti va cun Hans Martin Meuli en la cursa.
Las elecziuns per la regenza da Cuira èn ils 9 da zercladur 2024.