La davosa giada ha l'uffizi d'energia stimà 2012 il potenzial d'energia da vent en Svizra che rodas da vent possian porscher 3,7 uras terawatt (TWh) per onn. Il svilup tecnic haja dentant midà quai. 29,5 TWh per onn saja pussaivel. Per cumparegliaziun: In'ovra atomara producescha 8,9 TWh per onn.
Grond svilup en tecnologia e politica
Rodas pli grondas possian porscher dapli energia, concluda il studi sin incumbensa da l'uffizi d'energia. Però betg mo la tecnologia haja midà, mabain era las circumstanzas politicas n'èn betg las medemas sco tarla calculaziun dal 2012. Ovras d'energia da vent cun ina producziun da dapli che 20 uras gigawatt (GWh) èn decleradas d'interess naziunal. Qua tras èn rodas da vent era lubidas en guauds ed entaifer l'inventari da cuntradas e monuments.
Cun quai possia ins sminuir la dependenza d'energia da l'exteriur. Gia cun nizzegiar 30% da las capacitads possian ins porscher 8,9 TWh – da quai 5,7 TWh durant l'enviern. Il potenzial giascha per la gronda part en la Svizra Bassa (17,5 TWh). En las grondas valladas da las alps ed en l'artg dal Giura possian ins producir 7,8 TWh.