Cuira
In proxim pass per la stanza da consumar drogas a Cuira. Il credit per il project da pilot è segirà cun il Gea da las votantas ed ils votants. 66% da la populaziun da Cuira ha ditg Gea al project.
Durant trais onns vegnan persunas dependentas a pudair consumar drogas en il local. Il credit munta a radund 3,9 milliuns francs. Da quai èn 2,7 milliuns francs per manaschi e pajas da collavuraturas e collavuraturs. 640'000 francs èn per la segirtad en il local e il conturn dal local. Ina mesa milliun francs è per investiziuns en l'infrastructura.
156 vuschs han fatg la differenza. La citad Cuira po dar a la societad da construcziun City West il dretg da bajegiar sin ina parcella a Cuira Vest.
La societad da construcziun City West planisescha sin l'areal sper las duas chasas autas in'ulteriura chas'auta. Ella duai avair 22 auzadas.
Il parlament aveva recumandà da dar a la City West il dretg da construcziun. Tras ils tschains dal dretg da construcziun possia la citad profitar, e Cuira Vest possia sa sviluppar. Davos la societad stat tranter auter la Domenig Immobilien SA.
Glion
La concessiun da las Ovras electricas Zervreila SA scada il 2037. A l'urna è vegnì decidì, che quella na vegn betg prolungada. Uss datti la pussaivladad d'elavurar in nov contract e da tscherner in nov partenari, u surpigliar il manaschi ensemen cun il chantun Grischun. La suprastanza ha uss d'elavurar il proceder suandant en chaussa.
932 èn sta per betg prolungar la concessiun e 269 persuenter, sco la vischnanca da Glion scriva en ina communicaziun.
Flem refusescha revisiun
A Flem n'è la revisiun da la planisaziun d'utilisaziun da la part abitadi e da la lescha da construcziun betg vegnida acceptada. Quai ha annunzià la chanzlia communala da Flem sin sia pagina d'internet. 471 han vuschà Gea, 640 han vuschà Na.
La revisiun avess duì actualisar ed adattar la planisaziun e la lescha da construcziun a la lescha federala da la planisaziun dal territori.
La pendiculara existenta per l'access a l'alp Crap da Flem po vegnir sanada. A quai dian 837 persunas Gea e 309 Na. Per optimar il diever e per cuvrir ils custs da manaschi duai la nova pendiculara era vegnir duvrada turisticamain.
Plinavant vegn la fermada dal bus a Fidaz bajegiada ora per correspunder a la lescha davart l'egualitad da persunas cun impediments. En il project è era integrà in plaz per ch'il bus possia sa manar, ina tualetta publica ed ina susta per ils passagiers. Il credit correspundent munta a 8,8 milliuns francs.
Arosa sustegn Hochwang
Il territori da skis Hochwang è sin via da puspè vegnir reavert . E la vischnanca d'Arosa ha en quai connex ditg Gea ad ina midada da la lescha da turissem.
Uschia vegn la taxa turistica a Molinis, S. Peter, Pagig e Peist dublegiada. Quels daners pon lur vegnir duvrads per mantegnair il manaschi a lunga vista.
Scuol elegia Guler e Damerow
Seraina Guler da Sent ed Iwan Damerow da Tarasp èn da nov en la suprastanza communala. Da 3'397 han 761 dà giu lur vuschs. 489 han dà lur vusch a Guler e 373 a Damerow. Il pli absolut è stà tar 270 vuschs. Quai scriva la vischnanca da Scuol en ina communicaziun a las medias.
Dasper Damerow ha er Denny Griep candidà, ch'è dentant betg vegnì elegì. El ha candidà cun Damerow per il sez da Daniel Stecher, che ha demissiunà per motivs persunals. Il sez che Guler occupa è vegnì liber perquai che Chasper Alexander Felix è vegnì elegì sco collavuratur da la vischnanca, e na dastga betg esser commember da la suprastanza.
Mustér conceda dretg d'aua
Las pendicularas da Mustér survegnan la concessiun dal dretg da las auas. 72% da las votantas ed ils votants da Mustér han approvà quai. Per pudair bajegiar ora ils indrizs dad ennavar duain las pendicularas survegnir il dretg da duvrar l'aua da Magriel e dal dutg d'Acletta. Il contract tranter la vischnanca e las pendicularas vala per 30 onns.
Plinavant han las votantas ed ils votants approvà ina revisiun parziala da la planisaziun locala per la Val Sogn Placi e la Val da Cuoz. La revisiun è stada necessaria per adattar la planisaziun a la lescha dal spazi d'auas. 74% han ditg Gea a quella, sco la vischnanca da Mustér scriva en ina communicaziun sin sia pagina d'internet.
Tavau regulescha pli ferm il WEF
Tavau vegnia mintgamai als cunfins da sias capacitads durant il WEF. Cun la revisiun parziala da la lescha da construcziun ha la vischnanca uss dapli pussaivladads da diriger il traffic e las lavurs da construcziun.
82% da las votantas ed ils votants han ditg Gea a la revisiun, communitgescha la vischnanca da Tavau sin sia pagina d'internet. Per l'ina vul la vischnanca en l'avegnir pudair limitar il dumber da bajetgs temporars. Per l'autra vul ella explicitamain fixar en la lescha excepziuns per quels durant il scumond da bajegiar l'enviern. E la vischnanca ha era fixar en la lescha ina limita da taxas singulas per construir sin 1'500 francs.
Malans vul meglra via da velos
Il suveran da Malans ha decidì davart in credit d'impegn en l'autezza da trais milliuns francs per meglierar la colliaziun da velo tranter Malans e Landquart. 579 han ditg Gea e 340 Na, scriva la vischnanca sin sia pagina d'internet. La radunanza communala aveva cusseglià la fin da mars da refusar quest credit.
Mesocco cunter servetsch d'ambulanza
La vischnanca ha refusà duas iniziativas, sco la ella ha annunzià sin sia pagina d'internet. Ina ha vulì introducir il sistem da proporz per las elecziuns dal presidi, dal cussegl communal e dal cussegl da scola. Ella è vegnida refusada cun 339 vuschs Na e 110 vuschs Gea.
L'autra iniziativa ha pretendì in servetsch d'ambulanza garantì 24 uras al di a Mesocco. Qua han 253 ditg Na e 210 ditg Gea.
Vaz vul dapli spazi d'abitar
Vaz ha approvà ina revisiun parziala da la planisaziun locala. Igl è ì per dapli spazi d'abitar. Sco la vischnanca da Vaz scriva sin sia pagina d'internet, han 594 persunas ditg Gea, 222 èn stadas cunter la revisiun.
La vischnanca posseda terren per bajegiar emprimas abitaziuns, ha per quai dentant stuì restrenscher ina zona da sport d'enviern. Plinavant ha stuì vegnir midada la zona dal terren.
Domat
Domat ha reelegì Erich Kohler sco president communal. Ed er las commembras ed ils commembers da la suprastanza èn vegnids reelegids, sco la vischnanca da Domat ha annunzià en ina communicaziun a las medias.
Medel/Lucmagn
A Medel/Lucmagn è il president communal e la suprastanza tuts vegnids reelegids, sco la chanzlia communala communitgescha.
President communal resta Claudio Simonet. Corsin Flepp e Werner Venzin pon far in'ulteriura perioda d'uffizi sco suprastants e Lucas Venzin è per ulteriurs quatter onns suppleant. Era reelegida è la cumissiun da quint e gestiun e l'instanza da bajegiar.
Claustra
Hansueli Roth resta cun 862 da 1064 vuschs valaivlas president communal da Claustra. Nov en la suprastanza èn Marco Hobi e Stephanie Mayer-Bruder. Er il parlament communal è vegnì elegì.
Tusaun
Tusaun di Gea a la revisiun parziala per l'elevaziun da contribuziuns d'osps e promoziun dal turissem. 78% han approvà la revisiun parziala, sco la vischnanca da Tusaun ha communitgà.
Favugn
A Favugn è vegnì approvà il rapport annual 2023. Plinavant è vegnida decidida la revisiun totala da la lescha da bajegiar cun 507 vuschs Gea e 187 Na. En quest connex datti era ina revisiun parziala da la planisaziun locala en il sectur da l'abitadi. Qua vai per adattar la lescha communala a la lescha federala da la planisaziun dal territori. Quai ha la vischnanca da Favugn communitgà en ina communicaziun a las medias.
La vischnanca ha constatà en il process da la planisaziun dal territori, che las reservas da terren da bajegiar na tanschan betg per il svilup prognostitgà da Favugn. Ord quai motiv vegnan fatgas diversas adattaziuns vi da las zonas entaifer il vitg. En intginas zonas vegn pussibilità d'engrondir bajetgs existents (mellen sin il maletg sut). Las zonas marcadas blau n'èn anc betg surbajegiadas – quai duai dentant sa midar entaifer dals proxims 8 onns.
Regiun Engiadina Bassa/Val Müstair
En l'Engiadina Bassa / Val Müstair èn derschaders e derschadras vegnidas elegidas, cunquai ch'igl ha dapli candidats e candidatas che sezs.