Las vischnancas concessiunaras ed il chantun sa participeschian oz cun radund 20% als implants da forza idraulica che tutgan per gronda part a concerns d'energia d'auter chantuns. Per dar dapli pais a la forza idraulica e siu potenzial economic vul la regenza uss rinforzar la forza idraulica durant ils proxims decennis. La strategia en quest connex è sin maisa.
Survegnir ovras electricas en mauns grischuns
Tranter il 2035 e 2050 scadan en il chantun Grischun in grond dumber da concessiuns d'ovras d'aua. La regenza vul nizzegiar quai sco schanza per sa participar pli ferm en quest champ per uschia nizzegiar meglier il potenzial economic sco er contribuir a la midada energetica. Uschia haja il Grischun uss la pussaivladad da maschedar da nov las chartas. La finamia: Enstagl che societads en la Bassa han la maioritad da las ovras electricas, duain vischnancas e chantun avair l'ultim pled en chapitel. Quella finamira veglian ins cuntanscher cun far novs contracts da concessiuns.
Il mument è il chantun participà cun circa 10% a las ovras idraulicas en Grischun. Il futur duai quella participaziun crescher sin 30-40%. Er las vischnancas duain surpigliar ina cumpart, uschia che la maioritad restass en mauns grischuns. La finamira centrala è che la valur che vegn creada cun forza idraulica resta en Grischun.
Proxim pass: missiva vegn tractada en Cussegl grond
En ina missiva al Cussegl grond mussa la regenza tranter auter co ch’il chantun Grischun vul ir enturn ils proxims decennis cun la forza idraulica. El vul crear dapli valur e rinforzar la segirezza dal provediment da la forza electrica. Il Cussegl grond vegn a tractar la strategia davart la forza idraulica chantunala en sia sessiun da favrer da l’onn che vegn.
Ord l'archiv
L'istorgia da las trais ovras idraulicas da Valragn, Marmorera e la Greina.
