In proxim pass per la stanza da consumar drogas a Cuira. Il credit per il project da pilot è segirà cun il Gea da las votantas ed ils votants.
66% da la populaziun da Cuira ha ditg Gea a las votaziuns. Els suandan pia a l'opiniun dal parlament communal ch'aveva recumandà in Gea. La stanza duai gidar da schliar tensiuns en connex cun la scena da drogas averta en la citad.
Durant trais onns vegnan persunas dependentas a pudair consumar drogas en il local. Il credit munta a radund 3,9 milliuns francs. Da quai èn 2,7 milliuns francs per manaschi e pajas da collavuraturas e collavuraturs. 640'000 francs èn per la segirtad en il local e il conturn dal local. Ina mesa milliun francs è per investiziuns en l'infrastructura.
A lunga vista pudess er il chantun surpigliar ils custs dal local. Quel vegn a manar en il medem local ina cuschina ed indrizs sanitars. La finamira dal project saja tranter auter che betg uschè bleras persunas dependentas sa radunan en il «Stadtgarten».
Tenor plan po il local da consumar vegnir manà a la Sägenstrasse 75 en il center da Cuira. Il davos hai dà resistenza cunter quels plans, cun vischinas e vischinas dal lieu planisà ch'han suttascrit ina petiziun cunter il lieu. Enfin la fin dal zercladur duai in'evaluaziun approfundada dal lieu vegnir fatga.
Tar ils ulteriurs pass tutga uss, che la citad dat en la dumonda da bajegiar, ha ditg Patrik Degiacomi dal departament da cultura e sport. Quai pudess cuzzar radund tschintg mais. Silsuenter èsi dentant anc da quintar cun recurs, quai pudess retardar anc ina giada il process.
