La direcziun dal Centro Sanitario Bregaglia (CSB) n'ha fatg nagut sbaglià en connex cun las relaschadas da las tschintg tgirunzas – quai è la conclusiun da la cumissiun administrativa, ch'ha examinà l'entira situaziun tumultusa. Per las tschintg tgirunzas relaschadas è quai ina schleppa. Lur renfatscha: la direcziun dal center a Bregaglia haja spargnà sin lur custs cun relaschar tgirunzas pli veglias che lavuran gia ditg là e custan perquai dapli. Tenor la cumissiun administrativa saja dentant sulet la communicaziun stada manglusa.
Las tgirunzas avevan, cun sustegn dal sindicat da lavur tessinais, fatg recurs cunter lur relaschadas cun la finamira da puspè pudair turnar a la lavur e ch'il directur dal CSB vegnia relaschà. Questas pretensiuns ha la cumissiun administrativa dentant numnà «betg realisticas». Per la cumissiun administrativa è il cas cunquai mess ad acta – ins na vegnia betg pli a prender posiziun publicamain en chaussa. Las tschintg tgirunzas han dentant la pussibilitad d’instradar proxims pass giuridics.
Las 5 tgirunzas relaschadas sa dostan
Durant quatter uras han il sindicat da lavur tessinais, las tschintg tgirunzas e la cumissiun d’administraziun dal CSB discutà. Anc ina giada sajan las rinfatschas dal sindicat vegnidas discutadas. Sin maisa èn vegnids mess renfatschas dal sindicat tessinais, che pretendan, che la desditga a las 5 dunnas saja vegnida fatga or da motivs da spargn. Era las dunnas pertutgadas da la disditga èn vegnidas a pled. Ellas sa sentan tractadas malgist, er perquai che ella e sias collegas sajan vegnidas classifitgadas da la direcziun sco collavuraturas da pli bass nivel ch'il rest dal persunal.
Suenter ha Maurizio Michael, il president da la cumissiun administratica dal CSB, ditg envers RSI, che la cumissiun è vegnida a savair infurmaziuns novas da las dunnas e dal sindicat. Uss vulan ils responsabels e responsablas suandar quellas internamain, e decider co ch'i va enavant fin ils 8 avrigl.
Tumult pervi da tschintg relaschadas
Tschintg impiegadas dal Centro Sanitario Bregaglia èn vegnidas relaschadas, rapporta RSI. In fatg ch'haja chaschunà grondas tensiuns tar il persunal. Il sindicat da lavur tessinais – che las dunnas pertutgadas han contactà – suppona motivs finanzials per la relaschada, declera il secretari chantunal Fausto Calabretta.
La direcziun dal center a Bregaglia ha tenor noss’opiniun relaschà las tgirunzas pli veglias ch'han lavurà da 10 fin 32 onns a Spino, perquai ch’ellas custan dapli.
Il sindicat pretenda, che las tschintg tgirunzas vegnian puspè emploiadas e vul in discurs cun la cumissiun administrativa dal center da sanadad. Las relaschadas hajan provocà gronda malcuntentientscha tar las pertutgadas e lur collegas da lavur. Tuttas tschintg dunnas èn da la Val Chiavenna – la regiun da quella che 70% dals emploiads dal center da sanadad derivan.
Adattaziuns organisatoricas
La direcziun dal Centro sanitario Bregaglia n'è anc betg s'exprimida en chaussa. Percunter ha Maurizio Michael – da la cumissiun administrativa dal CSB – confermà d’avair enconuschientscha dals cas. El declera che la decisiun da la direcziun dal centro saja stada en il senn da la gestiun. Ils pertschients da persunal qualifitgà en il center en Bergiaglia sajan numnadamain stads in toc sur il minimum legal enfin uss:
La direcziun ha curregì quest dischequiliber ed agì en il senn da la gestiun.
La cumissiun administrativa dal Centro sanitario Bregaglia dovria uss temp per decider co cuntinuar en chaussa, di Maurizio Michael. Sustegn per las impiegadas relaschadas ch'èn a la tschertga d'in nov engaschament è vegnì empermess, ma il sindicat resta sceptic, sco Fausto Calabretta ha ditg envers RSI.
Sbagls en la communicaziun
Envers RTR ha Maurizio Michael admess che la communicaziun davart il cas, intern ed extern, na saja betg stada ideala:
La communicaziun, u meglier ditg la infurmaziun sur da la decisiun tratta da la direcziun na era betg propi buna. E la è capità evidentamain in sbagl. Quai n’a betg gidà al persunal ed era la populaziun per chapir che chi capita, mo era perche ch’ans fatga quests pass.