Suenter ils virivaris èn la chasa da tgira, avevan ils responsabels engaschà ina persuna externa dal fatg per pudair analisar e meglierar la situaziun en la tgira. Tenor Patrick Schaniel, president communal da Sumvitg e responsabel per la communicaziun da la Casa s. Martin, hajan ins introducì mesiras sin basa da quest'analisa: la chasa da tgira sa chattia en in process da transfurmaziun.
Mancanza da persunal saja stà in motiv
La Casa s. Martin saja stada en ina situaziun extraordinaria pervia da la mancanza da persunal. L'analisa demussia tenor Patrick Schaniel ch'i haja dà tar il persunal ina situaziun da schoc. Quella saja vegnida generada tras differentas midadas da persunal en curt temp. Consequenza saja stà che tscherts process – cunzunt la communicaziun en chasa – haja patì. Pertge ch'i ha dà tantas demissiuns ils davos onn na vul Schaniel betg discutar. El veglia sa focussar sin l'avegnir.
Ina conclusiun dal rapport davart ils motivs per ils virivaris saja er, ch'il squitsch psichic saja creschì fermamain durant quest temp – quai d'ina vart pervia da la mancanza da persunal, ma da l'autra vart er pervia dals rapports negativs da las medias en connex cun la Casa s. Martin.
Il rapport d'Andrea Brauch, la cussegliadra externa che ha analisà il manaschi da la tgira durant il davos mez onn, concluda che la communicaziun entaifer la chasa, las partiziuns ed ils teams saja centrala. Tenor Patrick Schaniel saja quai l'emprim focus per las mesiras da transfurmaziun.
En general ston la communicaziun e la collavuraziun tranter las partiziuns vegnir meglras.
Meglierar la communicaziun en l'avegnir
Quai èn ils pass concrets ch'ils responsabels han planisà per meglierar la situaziun:
- La damaun da las 8 duai mintgamai dar in curt rapport cun tut las responsablas ed ils responsabels dal di per discutar infurmaziuns relevantas.
- Persunas d'autras partiziuns sa gidan en l'assistenza dals cussadents e las cussadentas. Quai tranter duai er schabegiar tranter las partiziuns.
Adattaziuns davart la Cumissiun casa na dettia naginas. Il president da la cumissiun chasa ed il mainachasa ch'én stads en il focus da la critica, restan vinavant en uffizi. Plinavant sa midia èn il mument nagut tar ils gremis operativs e strategics. En vesta a la Reit da sanadad Surselva pondereschian ils responsabels da metter ensemen la Fundaziun da la Casa s. Martin e la Corporaziun «Casa da tgira Sutsassiala».
Ils trais presidents communals èn vegnids élegids cun grond pli en la cumissiun chasa, ier tar la radunanza dals delegads.
La direcziun ed il president da la Cumissiun casa vegnian buc mess en dumonda. La Cumissiun casa stettia cumplainamein davos els. Il process da transfurmaziun saja uss lantschas uschia Patrick Schaniel. La Casa s. Martin ha preschentà ils emprims resultats resumads curts: Communitgar meglier, per exempel cun rapports quotidians e blers discurs individuals cun il persunal. E las partiziuns duain sa gidar, er sur las partiziuns ora.
La cussegliadra externa Andrea Brauch na va betg a perder a la Casa s. Martin. Ella vegn enfin la fin da l'onn a sustegnair la manadra dalla tgira ed il mainachasa.
