Situaziun da partenza: Bleras annunzias tar il chantun
Cura ch'i dat irregularitads en ina chasa da tgira e d'attempads è l'Uffizi da sanadad chantunal la dretga adressa da s'annunziar. Quai han era passa 20 persunas pensà cura ch'ellas han scrit a l'uffizi ed infurmà quel davart la situaziun problematica en la chasa d'attempads da Trun, la Casa s. Martin. Là avevi dà ils mais passads diversas renfatschas envers ils responsabels, tranter auter er dal medi da chasa Martin Tomaschett.
L'Uffizi da sanadad dal Grischun ha entant bain confermà d'avair survegnì las annunzias. Suenter quai èsi però restà ruassaivel. Ina resposta n'han las persunas ch'avevan fatg las annunzias betg survegnì, quai saja tenor l'uffizi da sanadad il proceder usità.
Tge ha l'Uffizi da sanadad fatg cun las annunzias?
Ils responsabels da la Casa s. Martin han scrit en lur davosa communicaziun a las medias ch'i na dettia – tenor l'Uffizi da sanadad dal Grischun – naginas annunzias che pretendian in'intervenziun da vart dal chantun. Il manader da l'Uffizi da sanadad dal Grischun, Rudolf Leuthold, metta a lieu la situaziun, suenter che RTR ha contactà el. Els n'hajan betg survegnì in'annunzia ch'haja descrit ina situaziun che fiss stada clera avunda per lantschar ina procedura da surveglianza. Las annunzias dettian però in maletg ed els hajan era discutà quai cun la Casa s. Martin a Trun e palesà lur vista. Co che quella vista guarda però ora resta chaussa interna.
L'Uffizi da sanadad ha bain da survegliar las chasas da tgira e d'attempads en il chantun e sch'i dess cas concrets nua che la sanadad u il bainstar da cussadentas e cussadents fissan periclitads, avess l'uffizi d'intervegnir immediatamain. Las chasas da tgira da lur vart èn obligadas da preservar las cussadentas ed ils cussadents da donns. Cunquai che las annunzias n'hajan betg pretendì in'intervenziun immediata dal chantun, haja l'uffizi da sanadad tschertgà il discurs cun la Casa s. Martin ed els sajan anc adina en barat cun ils responsabels.
Il chantun n'è betg responsabel per la gestiun d'in manaschi. Intervegnir a moda proactiva e garantir che tut funcziunia e che las dretgas persunas sajan en il dretg lieu è pensum dal manaschi e betg dal chantun.
Il chantun na saja betg responsabel per schliar problems da gestiun cun mesiras tenor il dretg da controlla.
Tge che nus avain constatà or da vista externa è che la communicaziun n'è betg adina stada optimala. Blers problems èn fatgs en chasa.
Problems ch'hajan manà a las 22 annunzias giu da Trun. Il proceder che suonda è però era reglà cleramain. Las persunas ch'han fatg in'annunzia survegnan ina conferma, entant mai tge che resulta e tge che vegn fatg cun las annunzias. Quai per raschuns da la protecziun da datas. Quai muntia però betg ch'il chantun na fetschia nagut.
Patrick Schaniel è il nov responsabel per la communicaziun
El discurs cun RTR ha Patrick Schaniel confermà, ch'igl haja da mancanzas en la communicaziun dal davos temp.
En l'analisa pertutgant la communicaziun avain nus constatà che nus n'avain betg adina fatg ils dretgs pass ed ina mesira che nua avain prendì ord quella situaziun è, che jau sun la persuna responsabla per la communicaziun cun las medias.
La situaziun actuala en chasa taxescha Patrick Schaniel sco ruassaivla. Il clima da lavur saja bun e la qualitad da tgira buna.
Pledentà sin las 22 annunzias che l'Uffizi da sanadad dal chantun Grischun ha survegnì d'anteriuras collavuraturas di il nov responsabel per la communicaziun:
Nus avevan survegnì enfin uss l'infurmaziun dal chantun ch'igl ha dà annunzias. Jau sai ussa da Vus che quai èn 22 annunzias. Per la qualitad da la tgira han quellas dentant nagina relevanza.
Per analisar la situaziun actuala ha la Casa s. Martin engaschà ina cussegliadra. Andrea Brauch ha sustegnì ils davos mais la tgira ed analisescha la situaziun actuala.
Nus avain sin maisa in rapport intermediar e spetgain ussa sin la finalisaziun da quel. Suenter analisain nus la situaziun e pigliain las mesiras necessarias.
Tge mesiras che quai pudessan esser, ha Patrick Schaniel anc betg pudì dir. La chasa saja en ina fasa da transfurmaziun uschia che l'analisa cumpiglia l'organisaziun tant sin il stgalim strategic sco era sin il stgalim operativ. Las persunas en uffizi actual na vegnan en il mument betg messas en dumonda.
Nus n'avain betg previs da dar visadas. Nus stain davos noss president da la cumissiun chasa, Daniel Tuor e nus stain davos noss maina-chasa Donat Nay e nus stain era davos la direcziun uschia sco ella sa cumpona oz.
