Landquart
Andreas Thöny da la Partida socialdemocratica è elegì sco nov president da vischnanca da Landquart. El ha survegnì 1'599 vuschs, ses cuntracandidat, Martin Heim da la Partida populara, ha survegnì 903 vuschs. La participaziun è stada tar 48,4%. Thöny suonda a Sepp Föhn ch'è en uffizi dapi il 2015. La nova legislatura cumenza il prim schaner 2025.
Mustér
Il suveran ha decis cleramain da sbassar il pe da taglia da 110% sin 99% da la taglia chantunala simpla. Quai cun 726 vuschs Gea, encunter 216 vuschs Na. Las entradas da la vischnanca sa sbassassan per var 400'000 francs per onn.
Cun 78% da las vuschs è vegnida approvada la revisiun parziala da la planisaziun locala. Uschia vegnan ademplidas las pretensiuns surordinadas per mantegnair il manaschi da l'explotaziun da crappa Ragisch/Mumpé Medel.
La participaziun a la votaziun è stada tar radund 65%.
Flem
Il suveran da Flem ha cleramain acceptà la revisiun parziala dal plan da zonas e dal plan general d'avertura, cun 879 vuschs Gea encunter 196 Na, tar ina participaziun da 57,8%. Entras quai vegn stgaffida la basa legala per pliras attracziuns da temp liber e turissem – per exempel trails da mountainbike a Foppa e Startgels ed ina plazza da giugar per uffants.
Las votantas ed ils votants da Flem han era decis da betg prolungar la concessiun cun las ovras idraulicas Zervreila, quai cun 838 encunter 137 vuschs. Acceptà han quels da Flem la midada dals statuts, cun 817 encunter 124 vuschs. En il futur duain dapli ch'ina persuna da mintga vischnanca dastgar far part da la suprastanza da la Corporaziun da las vischnancas concessiunarias da las ovras electricas Zervreila.
Lumnezia
Las votantas ed ils votants da la Lumnezia na vulan betg prolungar la concessiun cun las ovras idraulicas Zervreila. Quai hani decis cun 507 encunter 198 vuschs, tar ina participaziun da 45%. Acceptà ha il suveran la midada da statut. En il futur duain dapli ch'ina persuna da mintga vischnanca dastgar far part da la suprastanza da la Corporaziun da las vischnancas concessiunarias da las ovras electricas Zervreila.
Claustra
Ils da Claustra dattan glisch verda a l'ovra idraulica per aua da baiver a Serneus. Quai cun 1'401 vusch Gea, encunter 141 vusch Na. Il project per l'ovra duai custar 1,475 milliuns francs. Ins possia quintar cun in gudogn da 5'500 francs mintg'onn ed ina producziun d'energia che basta per 100 chasadas.
La tschiffada da funtauna «Gute Brunnen» po vegnir sanada, plinavant pon vegnir renovadas las lingias d'aua a Serneus, la populaziun ha cleramain ditg Gea, cun 1'385 vuschs, da totalmain 1'526 vuschs valaivlas.
Era las taxas d'aua vegnan adattadas. Era questa decisiun è stada clera, cun 1'521 vuschs Gea. Concret vegn la taxa da basa per il provediment d'aua sbassada sin 0,1 ‰ da la valur d'assicuranza da la chasa. La taxa da basa per la serenaziun vegn sbassada sin 0,3 ‰ da la valur d'assicuranza da la chasa.
Domat
Il suveran ha acceptà la revisiun totala da la constituziun. Igl ha dà duas variantas en connex cun dretgs da persunas emploiadas da la vischnanca: En ina na dastgan tut las persunas impiegadas tar la vischnanca betg pli far part dal parlament communal - questa varianta è vegnida acceptada cun 55,06% da las vuschs.
L'autra varianta prevesa che be persunas impiegadas da la vischnanca en funcziuns da manar na dastgan betg pli far part dal cussegl communal – era questa varianta è vegnida acceptada, cun 56,16% da las vuschs.
Igl ha plinavant dà ina dumonda decisiva, en cas ch'omaduas variantas vegnian acceptadas. Tar questa dumonda han 52,75% dals votants e votantas preferì la varianta che nagin che lavura per la vischnanca dastga far part al cussegl communal. Be 47,25% èn stads per la segunda varianta. En il futur na dastgan persunas che lavuran per la vischnanca betg pli far part al cussegl communal.
La participaziun è stada tar 44,5%.
San Murezzan
Tar l'elecziun substitutiva per il cussegl da vischnanca n'ha nagin dals candidats cuntanschì il pli absolut necessari dad 485 vuschs. Las pli bleras vuschs ha survegnì Regula Cadalbert da l'Allianza dal Center.
- Regula Cadalbert, AdC, 400 vuschs
- Adrian Ehrbar, PLD, 302 vuschs
- Moreno Triulzi, PPS, 155 vuschs
- Richard Dillier, Next Generation, 111 vuschs
Arosa
Tar ina participaziun da 52,43% ha il suveran dad Arosa acceptà la nova lescha da polizia, che vala per l'entira vischnanca fusiunada. 708 persunas han ditg Gea, 454 Na. La lescha cumpiglia tranter auter in scumond da littering e da far ses basegns en la publicitad. Plinavant vegn il diever dal terren public, il tegnair animals e disturbis da canera reglamentads.
Tavau
A Tavau po il nov center da manaschi da las ovras electricas Tavau AG (EWD AG) a Talstrasse vegnir construì. Il suveran ha ditg Gea a la revisiun parziala da la planisaziun locala cun 2'830 vuschs cunter 319 vuschs. Las ovras electricas Tavau AG (EWD AG) han actualmain plirs lieus da manaschi. Cun centralisar quels, dettia la pussaivladad da lavurar a moda pli effizienta.
Plinavant ha il suveran da Tavau decidì en in segund scrutini davart in nov commember en il parlament «Grosser Landrat». Elegì è Andreas Palmy da la PPS cun 1'398 vuschs. Michael Ambühl da l'Allianza dal Center ha survegnì 897 vuschs.
Cuira
La populaziun da Cuira ha refusà l'iniziativa da clima da la citad, cun 59,94% da las vuschs. La cuntraproposta dal cussegl da la citad è vegnida acceptada, quai cun 54,66%, tar ina participaziun da 52,49%.
L'iniziativa dal clima da citad leva che 1% da la surfatscha da Cuira ad onn daventa spazi verd, vias da velo u zonas da sentupada. La cuntraproposta dal cussegl da la citad vul era dapli zonas a favur dal clima, dentant cun cumbinar projects nua ch'i vegn gia bajegià e lura gist examinar sch'ins pudess crear dapli spazi verd u per velos e peduns.
Lantsch
A Lantsch è vegnì elegì Sandro Lenz en la suprastanza communala, igl è stà ina elecziun substitutiva. La legislatura actuala va anc fin il 2024. La suprastanta Sheila Karrer ha dentant decidì da demissiunar. Sandro Lenz ha survegnì 121 da 167 vuschs valaivlas, ses cuntracandidat, Mark Piccaluga, 39.
Trimmis
Il suveran da Trimmis ha acceptà ina revisiun parziala da la constituziun communala. 913 persunas han ditg Gea, 193 Na. La participaziun è stada tar 48,67%.
La finamira da la revisiun è da definir da nov la structura ed il manaschi da las autoritads da la vischnanca. La revisiun prevesa tranter auter che persunas or da la suprastanza communala survegnan in sez en il cussegl da scola ed en la cumissiun da bajegiar. Plinavant datti la pussaivladad da surdar lavurs a persunas terzas.
Val Müstair
Il suveran da la Val Müstair di Gea a la revisiun da la constituziun communala, cun 454 vuschs Gea e 126 vuschs Na. Concret vai per reducir la suprastanza da set sin tschintg commembers. Quai per far daventar pli effizient dentant er per chattar avunda persunas che s'engaschan en in tal post. Sper quai vegnan er ils dus gremis da la cumissiun da construcziun sco er dal cussegl da scola diminuids.
Vaz
La vischnanca da Vaz approva ina revisiun parziala da la lescha da prada, pastgira ed alp. 68,74% da votants e votantas han ditg Gea, quai vul dir 664 vuschs. La participaziun è stada tar 54%.
Concret vai per dar la pussaivladad da crear in post d'administraziun. Quai saja necessari cunquai che la lavur administrativa vegnia adina pli gronda. Plinavant datti midadas pitschnas, sco la pussaivladad da metter ad alp biestga manidla.
Zernez
La populaziun da Zernez ha acceptà cun in resultat stretg la revisiun parziala da la lescha communala da taglia. 295 persunas èn stadas per la midada, 260 encunter. La participaziun è stada tar 55%.
La revisiun auza la taxa sin valur dal terren da 1,5 ‰ sin 2,0 ‰. Las entradas supplementaras èn var 250'000 francs. Plinavant vegn francada ina taxa d'alloschi e per la promoziun dal turissem en la lescha. Quella taxa duai remplazzar la taxa da pernottaziun.