En il Grischun pon ins per part votar ed eleger sin via electronica en il futur. Il Cussegl federal ha approvà quai la mesemna. Igl è in project da pilot per pliras vischnancas en la Svizra.
La lubientscha vala per las vischnancas da Domat, Lumnezia, Puntraschigna, Poschiavo e Stussavgia e Landquart. Ils 3 da mars 2024 pon persunas cun il dretg da votar per l'emprima giada far quai sin via electronica. Or da motivs organisatorics èsi a Landquart pir pussaivel tar las votaziuns la stad, ils 9 da zercladur, uschia scriva il chantun Grischun en ina communicaziun a las medias.
Per nizzegiar la purschida, èsi da s'annunziar sin il pli tard 8 emnas avant il termin da vuschar u eleger tar la vischnanca. Sinaquai survegn ins in attest da votar cun la posta. En il sistem electronic da la posta svizra ston ins sa verifitgar avant votar. Il sistem da verificaziun vegnia controllà externamain e da la chanzlia federala a moda regulara per prevegnir maldiever.
La permissiun dal Cussegl federal vala enfin ils 8 da mars 2026. Emprovas per votar ed eleger a moda electronica datti er en ils chantuns Basilea-Citad, Son Gagl e Turgovia. Là han emprimas persunas gia elegì sin via electronica ils 23 d'october.
Sco ch'il Cussegl federal scriva, pudessan radund 77'000 persunas votar sin via electronica ils 3 da mars 2024.
