La nova constituziun per Domat è vegnida approvada cun radund 55% da las vuschs. La constituziun communala vertenta deriva da l’onn 1988 ed è dapi lura adina puspè vegnida augmentada e midada en singuls puncts. La nova versiun è pli simpla, ella cuntegnia be pli l’urden fundamental da la vischnanca, prescripziuns main impurtantas èn vegnidas stuschadas sin livel da leschas.
Tgi dastga esser en il parlament communal?
Sco pli impurtanta novaziun da la nova constituziun vala ch’i duai vegnir stgaffì egualitad giuridica: Actualmain dastgan persunas d’instrucziun appartegnair al parlament communal, auter persunal da la vischnanca dentant betg. La populaziun ha decis da scumandar a tut il persunal da la vischnanca da esser en il parlament. Bain è era la varianta che mo persunas che mainan na dastgan sa participar vegnida acceptada, cun 56,16% da las vuschs – tar la dumonda decisiva, tge varianta che vegn preferida, han 52,75% dals votants e votantas dà la preferenza a la varianta che nagin che lavura per la vischnanca dastga far part al parlament communal, be 47,25% èn stads da l'avis ch'i tanscha sche persunas che mainan èn sclaudas.
Pli simpla
Cun la revisiun èn pliras cumpetenzas vegnidas simplifitgadas ed adattadas, per exempel n'èsi per l’approvaziun dal preventiv betg pli necessari da votar a l’urna, mabain i tanscha in referendum facultativ. Era la substituziun vegn simplifitgada: La constituziun vertenta pussibilitescha ina substituziun, sch’in commember dal cussegl da vischnanca na po betg sa participar al cussegl pervi da malsogna, servetsch militar u absenza da dapli che trais mais. La nova regulaziun di ch’ina substituziun è pussaivla, sch’in commember dal cussegl da vischnanca è impedì da prender part per motivs stringents. En la nova constituziun vegn fixà che, dasper la lingua uffiziala tudestg, il rumantsch è la lingua usitada.
Dretg da votar per esters
Sche estras ed esters duain pudair votar u betg, vegn decis pli tard. Il passagi da dar dretg da votar a quels e quellas è vegnì stritgà, perquai ch'igl era dispitaivel. I duai dentant vegnir elavurà ina proposta e quella duai vegnir suttamessa al pievel pli tard.
