Marcel Bieler daventa il nov president communal da Panaduz. Il politicher senza partida succeda ad Elita Florin-Caluori che ha demissiunà. Quella aveva sustegnì il candidat da l'Allianza dal Center, Rico Caratsch. Quai aveva provocà pulita critica.
Marcel Bieler ha fatg 921 vuschs, ses concurrent Rico Caratsch è vegnì sin 404 vuschs. Singulas vuschs hai dà 14. La participaziun a l'elecziun è stada tar 55,9%, sco la vischnanca communitgescha.
Marcel Bieler è creschì si a Panaduz. En suprastanza è el stà fin ussa responsabel per il ressort furmaziun, cultura e sport. El maina actualmain ina cassa da malsauns. Rico Caratsch è oriund da la Val Müstair e viva dapi 19 onns a Panaduz. Fin uss è el stà responsabel en la suprastanza communala è per il ressort segirtad e sanadad. El lavura tar la Polizia chantunala grischuna.
La novelegida suprastanza communala:
| Nicole Sutter-Riedi | Allianza dal Center | 741 vuschs | elegida |
| Martin Gieriet | Partida verdliberala | 677 vuschs | elegì |
| Tobias Marty | Allianza dal Center | 644 vuschs | elegì |
| Stefan Herger | Allianza dal Center | 632 vuschs | elegì |
| Regina Rothenbühler | Partida populara svizra | 362 vuschs | betg elegida |
| Marcel Bieler | senza partida | 69 vuschs | betg elegì |
| Rico Caratsch | Allianza dal Center | 35 vuschs | betg elegì |
| Rico Degiacomi | senza partida | 16 vuschs | betg elegì |
| Singulas vuschs | 144 vuschs |
