Cun acceptar l'iniziativa per ina revisiun totala da la constituziun survegn la vischnanca da Glion ubain puspè ina radunanza communala, ubain in parlament communal pli pitschen. Uschia ha il suveran decidì cun dir Gea a l'iniziativa. Bain ha il suveran era ditg Gea a la cuntraproposta dal parlament, cun la dumonda da tagl èn ils e las da Glion dentant sa decididas per reveder dal tut la constituziun.
L'iniziativa per ina revisiun totala da la constituziun è vegnida approvada cun 61,2% da las vuschs, la cuntraproposta fitg cnap cun 50,3%. Uschia ha la dumonda da tagl stuì decider, e qua è il votum stà cler cun 56,8% da las vuschs per l'iniziativa.
Iniziativa e cuntraproposta
Avant in onn ha in comité inoltrà in'iniziativa per la revisiun totala da la constituziun. Il parlament da Glion ha lura constatà che l'iniziativa saja giuridicamain valaivla, ed ha formulà ina cuntraproposta. Tranter auter lascha la cuntraproposta avert sche la constituziun duai vegnir revedida en pliras revisiuns parzialas ubain en ina revisiun totala. La cuntraproposta propona da crear ina cumissiun da constituziun che na duess betg esser occupada cun dapli che 20% dals commembers actuals dal parlament.
Michal Hohl da nov en la suprastanza communala
En pli è Michal Hohl vegnida elegida en la suprastanza communala. Ella succeda ad Alice Bertogg-Darms, che ha demissiunà. La candidata socialdemocratica ha fatg 529 vuschs, tar in pli absolut da 348. Vitiers hai dà 165 vuschs singulas, 183 cedels vits e 112 cedels nunvalaivels.
