La gievgia ha l’anteriur president american gì da sa preschentar avant ina dretgira a Washington. Suenter ch’il plant è stà prelegì, ha Donald Trump renvià la rinfatscha d'avair empruvà da manipular las elecziuns e d'avair instigà a l'attatga sin il Capitol.
Quai è in fitg trist di per l’America.
Trump che vul puspè candidar tar la proxima elecziun presidenziala, ha repetì suenter il termin da dretgira la rinfatscha ch’il plant haja motivs politics. El valitescha mintga proceder giuridic cunter el sco emprova da ses adversaris d'impedir, ch'el turnia en la Chasa Alva. Tenor enquistas tar sia partida republicana è el cun distanza il candidat cun las meglras schanzas.
Ils detagls dal plant
L’anteriur president Donald Trump è vegnì accusà pervi da l’emprova d’influenzar l’elecziun, e pervi da l’assagl sin il capitol il 2021. Quai resorta da l’acta d’accusaziun ch’è vegnida publitgada mardi saira.
Concret vegn Trump accusà en quatter puncts, tranter auter pervia da conspiraziun cunter ils Stadis Unids. L’investigader spezial Jack Smith vul ch'i dettia tant pli svelt in process. L'attatga sin il capitol saja stada in'attatga sin la democrazia americana senza exempel, ha el ditg il mardi avant las medias. Ils 6 da schaner 2021 avevan aderents da Trump attatgà il capitol per impedir la conferma uffiziala da Joe Biden sco president.
I sa tracta da la segunda accusaziun sin stgalim federal cunter l’anteriur president – suenter quella en connex cun ils documents secrets ch'il FBI ha chattà en sia chasa en la Florida.
Reacziuns divididas en ils Stadis Unids
L’accusaziun saja ina admoniziun impurtanta: Tgi che craja da star sur la constituziun, duess mai esser president, ha ditg l’anteriur vicepresident da Trump, Mike Pence. La maioritad dals republicans percunter ha crititgà cun vehemenza l’accusaziun. Uschia er Ron DeSantis, il guvernatur da Florida. Ils democrats percunter beneventan ils ulteriurs pass giuridics. L’accusaziun vegnia a regurdar generaziuns che nagin na stettia sur il dretg, ha ditg Chuck Schumer, il manader dals democrats en il senat.
Or da l'archiv
Aderents da l'anteriur president american Donald Trump han assaglì il capitol, il schaner 2021. Quatter persunas eran mortas, 52 persunas blessadas.
