Suenter che la polizia federala FBI ha perquirì il bain «Mar-a-Lago» da l’anteriur president american Donald Trump en la Florida, duai in expert independent examinar ils documents ch’èn vegnids confiscads. Il ministeri da giustia a Washington ha communitgà d’er acceptar il candidat che Trump aveva proponì, il derschader Raymond Dearie da New York. Quai dasper dus experts ch’il ministeri sez ha nominà.
Il segund candidat ch'ils advocats da Trump han proponì ch'è giurist, ma betg derschader, ha il ministeri refusà. El n'haja betg questa experientscha. Cunquai ch'ils advocats da Trump na veglian betg ils dus candidats ch'il ministeri ha proponì, pervia da «diversas raschuns» che na vegnan betg numnads concret, pudess il derschader Raymond Dearie vegnir acceptà.
Chattà documents secrets a «Mar-A-Lago»
Tar ina razzia sin in bain da l’anteriur president dals Stadis Unids Donald Trump en la Florida, ha la polizia federala FBI confiscà documents secrets. Quai ha communitgà il ministeri da giustia a Washington. Tranter auter cuntegnian quels infurmaziuns che sajan strictamain confidenzialas che pudessan chaschunar grond donn als interess da segirezza dal pajais, sch'els vegnissan publitgads. En pli suspectia il ministeri che Trump haja cuntrafatg a la lescha da spiunascha. Il minister da giustia Merrick Garland ha persunalmain approvà la perquisiziun dal bain «Mar-A-Lago» a Palm Beach. En l’istorgia dals Stadis Unids èsi l’emprima giada insumma ch’i ha dà ina perquisiziun tar in anteriur president.
En ils Stadis Unids da l'America èsi prescrit che tut la correspundenza dal president ha da vegnir archivada. L’anteriur president duai dentant avair prendì cun el 15 chistas cun documents da regenza, souvenirs, regals e brevs a Mar-a-Lago. Trump ha numnà l’acziun «persecuziun politica» e ch’i saja in'attatga dals «democrats radical sanesters».