Ils 6 da schaner 2021 han aderents da Trump assaglì il Capitol. Pliras persunas han pers la vita, tranter auter in policist. La cumissiun ch’intercurescha l’assagl sin il capitol a Washington, pretenda uss consequenzas per il president da lez temp, Donald Trump. I na dettia nagin dubi che Trump haja controllà e manà in sforz coordinà per cupitgar il resultat da l’elecziun dal president il 2020, ha ditg la presidenta da la cumissiun.
187 minutas fin che Trump haja reagì
I saja stà evident che la situaziun en il Capitol saja stada violenta e ch’ella saja spertamain escalada, ha ditg la vice-pledadra da la Chas’alva da lez temp, Sarah Matthews, durant ina audiziun publica. Pliras perditgas han ditg avant dretgira ch'i saja stà pussaivel da vart da Trump da terminar quest'agressiun. 187 minutas hai durà fin che Trump haja fatg in messadi da video nua ch'el ha ditg a la massa ch'i duessan ir a chasa.
Il settember vegni a dar ulteriuras audiziuns. La cumissiun sezza na po betg sentenziar Trump, quella decisiun sto il ministeri da giustia far.
