Concret duain las organisaziuns vegnir scumandadas per tschintg onns – cun opziun ch'il parlament po prolungar il scumond. La Hamas ed organisaziuns parentas duain valair sco organisaziuns terroristicas. Sco organisaziuns parentas valan gruppas terroristicas ch'han finamiras sumegliantas, metodas e persunas directivas sco la Hamas. Avant ch'il Cussegl federal po scumandar uschè organisaziuns, ston las duas cumissiuns da segirtad dal parlament dar lur consentiment. Tgi che violescha il scumond duai vegnir chastià cun praschun ubain chastids da daners.
Cun il scumond da la Hamas vegniss sbassà il ristg per activitads terroristicas en Svizra. Plinavant survegnan las autoritads ils meds per agir, cun quai ch'il scumond vegn pendì vid il dretg penal svizzer, uschia l'argumentaziun dal Cussegl federal.
Pretensiun unanima ord las cumissiuns
Gia l'october passà ha la Cumissiun per la politica da segirezza dal Cussegl naziunal pretendì, che la Svizra classifitgeschia l’organisaziun radical-islamica Hamas sco organisaziun terroristica. Quai ha la cumissiun decidì unanimamain. La cumissiun ha approvà duas intervenziuns parlamentaras en quest senn. Per la cumissiun vai era per la segirezza en Svizra. Per che las autoritads da segirezza possia s’activar stoppia la Hamas vegnir classifitgada sco organisaziun terroristica.
Era parlamentaris grischuns per scumond
Ch'i saja ussa necessari d'agir cunter l’organisaziun radical-islamica Hamas, da quai èn era persvas ils blers parlamentaris grischuns. Betg emblidar dastgian ins dentant la populaziun civila, tant l'israeliana sco era la palestinaisa, che stoppia ussa endirar las consequenzas dal conflict.
