Suenter ils rapiments d'ostagis israelians tras la Hamas è l'Israel tenor Peter Neumann sut pressiun. Neumann è professer per studis da segirtad al King's College a Londra e sa co che las tractativas tranter l'Israel e la Hamas èn passadas en il passà e pertge ch'i pudess esser auter questa giada.
SRF: Signur Neumann, tge vul la Hamas cuntanscher cun ils rapiments d'ostagis?
Peter Neumann: Jau crai ch'ils ostagis han duas funcziuns per la Hamas. L'emprima è l'umiliaziun da l'Israel. Tut il mund po vesair, qua èn Israelians en praschuns palestinaisas. La Hamas po far cun els tge ch'ella vul. Da l'autra vart han quests ostagis natiralmain la funcziun da carmalar ils Israelians en la Strivla da Gaza. Quai vuless la Hamas. Ella vuless ch'ils Israelians vegnan, emprovan da liberar ils ostagis, s'imponan en cumbats da chasa e produceschan uschia tut ils purtrets trids, uschia ch'i dat a la fin quasi ina sort invers dal delinquent e victimas. Betg pli la Hamas sco il delinquent, mabain ils Israelians. Jau crai ch'actualmain n'han ni la Hamas ni ils Israelians la pazienza per quai.
Co schazegiais Vus en las schanzas ch'i dat tractativas?
Las schanzas per tractativas èn fitg, fitg pitschnas. Per l'ina perquai ch'ils Israelians na vulan betg sa laschar en sin ellas. Els vulan liberar lur glieud. Els vulan che tuts vesan ch'ils ostagis èn vegnids liberads dad Israelians. Per l'autra savain nus per experientscha passada, che las tractativas d'ostagis cuzzan per part onns. Quai èn stentas per ina mediaziun che s'extendan durant blers onns.
Dain in sguard sin las tractativas passadas tranter Israel e la Hamas. Quant engaschà è l'Israel en talas tractativas?
En il passà era quai uschia che l'Israel era senz'auter pront per tractativas ed era pront da barattar be in schuldà da la vart israeliana cunter millis da praschuniers da la vart palestinaisa. Jau crai ch'igl è in pau auter questa giada, perquai ch'il squitsch è uschè grond. Il squitsch sin il primminister e la situaziun politica. La populaziun israeliana spetga ch'i capitia ussa svelt insatge. Ma las tractativas d'ostagis duran adina fitg ditg.
Nua vesais Vus ils privels per l'Israel tar las tractativas?
Il privel è natiralmain ch'ina segunda front s'avra. La concentraziun dals Israelians – da l'entir mund – è ussa dal tuttafatg sin la Strivla da Gaza cun ils ostagis. Là sa concentreschan las truppas. Da tschella vart datti natiralmain en il nord da l'Israel, al cunfin cun il Libanon, la Hisbollah che pudess avrir ina segunda front. E sche quai n'è betg il medem mument l'attenziun, lura pudess l'Israel vegnir surprais in'ulteriura giada.
Co stimais Vus las schanzas che l'Israel lantscha in'offensiva militara per deliberar ils ostagis?
La schanza è fitg gronda. Jau crai ch'ils Israelians han in pulit squitsch da demonstrar ch'els pon liberar quella glieud senza ch'els fetschian cumpromiss cun la Hamas. Perquai è quai l'opziun preferida. Il privel en quest connex è natiralmain, sco gia menziunà, ch'ils Israelians s'involvan en in cumbat cunter chasas ch'els lascha a la fin vesair ora mal, malgrà ch'els èn las unfrendas.
Il discurs cun Peter Neumann ha fatg Detlev Munz. Peter Neumann è schurnalist tudestg, publicist e professur per studis da segirtad al King’s College a Londra.
