«Las collavuraturas ed ils collavuraturs al lieu èn medemamain victimas dal conflict», di Fabrizio Carboni. El maina la secziun Proxim Orient e l'Orient Central dal Comité internaziunal da la Crusch Cotschna a Genevra.
La gronda part da las collavuraturas na sajan betg da l'ester, mabain or da la regiun. Durant il di prestian els ed ellas agid umanitar, la saira èn els ed ellas exposts als bumbardaments precis uschè sco tut ils auters umans. Perquai fa Carboni gronds quitads per la segirezza da ses collavuraturs al lieu. Passa tschient èn en acziun en la regiun.
Per il mument avain nus sistì tut nossas activitads per motivs da segirezza.
Er l'ovra d'agid «Terre des hommes» vesa critica la situaziun da segirezza dals agens collavuraturs. I saja grev da sa mover en la strivla da Gaza. Barbara Hintermann, directura generala a Losanna, di: «Per motivs da segirezza avain nus sistì tut nossas activitads. Nus stuain l'emprim chapir tge che capita ussa ils proxims dis.» Per il mument na van ils indesch impiegads ed impiegadas da «Terre des hommes» en la strivla da Gaza betg en lur biros. A chasa sa sentian els pli segirs.
Pitschen agid è pussaivel
In servetsch minimal per sustegn psicologic per uffants po tuttina vegnir fatg. Via WhatsApp, sco gia durant la pandemia da corona, pon uffants vegnir sustegnids, tenor Hintermann .
Omaduas ovras d'agid, Terre des Hommes e l'IKRK, fan quitads davart la bloccada totala da la strivla da Gaza annunziada da la regenza israeliana. Passa dus milliuns umans n'han alura betg pli access ad electricitad, aua, victualias e carburant. Per Carboni dal IKRK na saja quai betg da giustifitgar. La missiva da las ovras d'agid svizras è damai clera. In corridor per l'agid umanitar stoppia restar avert.
