Interrupziun dal current - Spagna e Portugal sveglian or dal blackout

Il sistem lavuria entant praticamain puspè nomal e prest l'entir basegn possia vegnir cuvert, communitgescha la gestiunaria da la rait spagnola Red Electrica.

Sumegliant tuni era da vart dal gestiunari protugais REN. La regenza a Lissabon ha declerà, ch'il sistem da sanadad possia puspè lavurar normal e las scolas sajan era puspè avertas. La raschun per il blackout n'è anc adina betg clera. Er ina attatga da cyber na possia betg vegnir excludida cumplettamain.

La situaziun il glindesdi

Curt avant las 13:00 è il current crudà ora en la gronda part da la Spagna e dal Portugal. Enfin ch’il current funcziuna puspè, pudessi tenor las autoritads localas durar sis fin diesch uras, hai gì num il di da l'interrupziun. En intginas parts dals pajais funcziunava il current envers la saira dal gliendisdi gia puspè, il provediment duai vegnir reparà pass per passl, avevan las autoritads localas declarà.

Era metropolas sco per exempel Madrid, Barcelona e Sevilla èn stadas pertutgadas dal blackout. La metro n'ha betg funcziunà, sper il current interrut na devi era nagin internet, la rait dal tren è stada bloccada. Sin las vias hai dà in caos da traffic perquai che las amplas n'han betg funcziunà, sgols han stuì vegnir stritgads u spustads. Intgins ospitals han funcziunà mo pli grazia als generatur d'urgenza e las scolas èn per part stadas serradas. La situaziun ha dentant varià da regiun tar regiun e pajais tar pajais.

Il correspundent da SRF, Markus Böhnisch, ch'è a Barcelona ha en l'emissiun «10 vor 10» descrit la situaziun sco stgira ed inquietanta. La glieud saja restada calma, malgrà l'interrupziun massiva ed il caos da traffic.

Motiv per questa interrupziun

L'emprim è vegnì speculà ch'ina attatga da cyber pudess avair chaschunà la situaziun da blackout. En il decurs dal suentermezdi suppona l’agentura da l’Uniun Europeica per la segirezza da cyber dentant plitost ch’il motiv saja in incap tecnic e betg ina attatga da cyber. In gestiunari da la rait portugaisa ha inditgà, ch'in fenomen atmosferic rar haja chaschunà l’interrupziun da la forza electrica. Il problem sajan stadas las differenzas da temperatura extremas en l’intern dal pajais. Las autoritads èn vinavant en il process da sclerir il motiv per il blackout en detagl.

Impressiuns da Sevilla or dal caos calm

RTR ha s'informà tar Gaby Candrian – ch'è oriunda da Siat, en Surselva – co la situaziun è a Sevilla, en la Spagna. Dapi set onns viva ella gia là. Tenor Gaby Candrian saja la situaziun normala. Era sche l’internet ed il current na funcziunan betg. Sin las vias saja la situaziun dentant stada caotica, surtut enturn las rundellas cun quai che las amplas na van betg. Las autoritads hajan supplitgà, da betg ir cun l'auto sch'i n'è betg necessari. Gaby Candrian sezza era curt avant l’interrupziun anc en l'ascensur, ella ha pia gì fortuna. Per part saja il current enavos. En cas ch'i avess d'ir pli ditg, avessian ella e sia famiglia anc avunda mangiativas sin reserva.