Durant 47 uras pudess la Svizra betg avair energia, uschia il facit dal studi che quinta cun il mender scenari pussibel: Las ovras atomaras Beznau 1 e 2 sco er in terz da las ovras en Frantscha na funcziunan betg pli e la UE reducescha la furniziun d'energia en Svizra.
Uss èsi impurtant da betg far panica. La Svizra è posiziunada bain, però nus stuain prender serius la situaziun ed amplifitgar energia indigena en Svizra e quai considerablamain.
Sa focussar sin la Svizra
Per evitar quest scenari duain per l'ina energias regenerablas, sco sulegl e vent, vegnir promovidas pli fitg en Svizra. Per l'autra duain ils lais da fermada avair ina reserva d'aua obligatorica. Cun quell'aua pudessan ins lura producir energia gist en muments ch'i vegn propi stretg. Il zercladur 2021 ha il Cusssegl federal surdà al parlament il messadi davart quella lescha federala.
Novas ovras atomaras n'èn nagin'opziun
Da la dretga hai num ch'i dovria l'energia d'ovras atomaras per cuvrir en futur il provediment d'energia en Svizra. Tenor la ministra d'ambient n'èsi nagin'opziun da bajegiar novs implants.
La branscha di quai cler. I na renda insumma betg, igl è bler memia char. Oz dettia bler pli favuraivlas pussaivladads cun energias regenerablas. Las ovras pitschnas, da quellas ch'i vegn discurrì, existan mo sin il palpiri.
