En l’emprima mesira vai per far ina reserva d'aua per forza idraulica per il proxim enviern. Quai munta ch’ina reserva d'energia vegn tegnida enavos, per che quella possia vegnir nizzegiada en cas urgents. Per quella reserva vegnan ils producents d'energia pajads.
La segunda mesira prevesa da construir ovras electricas che vegnan mo en funcziun en cas d'urgenza. Quellas ovras duain esser neutralas al clima. Nua ed en tge dimensiun n’è dentant betg cler. En il focus vegnan dentant surtut lieus, nua ch'i dat gia infrastructuras che na vegnan betg pli nizzegiadas.
Reducir consum da forza electrica
Il Cussegl federal na vul betg mo segirar il provediment cun metter a disposiziun dapli forza electrica. I va er per spargnar energia. Tranter auter vul il Cussegl federal promover che stgaudaments electrics vegnan remplazzads. Plinavant vul el midar las pretensiuns minimalas che pertutgan l'effizienza d'apparats electrics.