La Partida populara svizra (PPS) ha preschentà in palpiri da posiziun per segirar il provediment d’energia en Svizra. La PPS vul oravant tut rinforzar la forza idraulica e fabritgar ulteriuras ovras atomaras per segirar il provediment d’energia. Tenor la partida ina soluziun effectiva, persistenta ed amiaivla al clima.
Per la partida Verda è quella strategia dentant in «sgol tschorv». En ina communicaziun contra la partida ch'il ristg d'ovras atomaras è anc adina grond. Oravant tut na dettia anc adina betg ina schliaziun per il rument radioactiv. Ed enfin ch’ins possia prender en funcziun ina tala ovra giaja anc ditg. Quai na saja betg la soluziun per segirar il provediment cun forza electrica. Era per la Partida socialdemocratica (PS) n'èn ulteriuras ovras atomaras betg la soluziun.
Tuttina na vesan las partidas sanestras betg sco soluziun d'investir e prolungar la durada da las ovras existentas. Era sch’ins investescha milliardas en il parc d’AKWs svizzer, ch'è il pli vegl sin il mund, na possian ins betg pli garantir la segirezza. La soluziun tenor las partidas sanestras è d’investir fermamain en energias regenerablas: forza idraulica, fotovoltaica e parcs da vent.
Prolungar la durada da vita da las ovras atomaras existentas vulan perencunter exponents da la Partida liberaldemocratica (PLD). Uschia duai vegnir garantì il provediment d’electricitad. Tenor il gestiunari d’ovras atomaras Axpo, po la segirezza d’in ovra atomara vegnir garantida per 60 onns. Dentant suenter n'hajan ins nagins studis che pon dir co i guarda or cun la segirezza.
Tar la tematica d'ovras atomaras vegn anc vitiers ch'i vegn grev da survegnir l’acceptanza en la populaziun. Quai perquai ch'il suveran svizzer ha ditg avant quatter onns Na a la forza atomara. Uschia mettess, per exempel la construcziun da novas ovras atomaras, sin il chau la strategia d’energia.
In'autra proposta vegn anc dal president da l’Allianza dal Center Gerhard Pfister. El ha fatg l'october la proposta dad ina Neat d’electricitad. Vul quasi dir che la Svizra fabritgass in tunnel per l’Uniun europeica per transportar la forza electrica tras la Svizra. Quai cun la speranza che l’UE integrass uschia puspè la Svizra pli fitg sin il martgà d’electricitad causa che la cunvegna da basa n'è betg vegnida realisada. Però quai pudess vegnir difficil, causa che l’UE è sezza vid fabritgar raits per transportar la forza electrica e daventa uschia pli independenta da la Svizra tenor il gestiunari da la rait Swissgrid.
La lescha federala per in provediment segir cun energia persistenta vegn probabel debattà proxim onn en il parlament.
