L’atleta da Grüsch ha persvadì fitg tar ses emprims gieus olimpics a Paris. Kälin ha terminà il heptatlon sco quarta e manchentà be per pauc ina medaglia. Sco quarta turna ella dentant a chasa cun in diplom olimpic.
Jau sun stada fitg constanta ed hai pudì clamar giu mes potenzial.
Annik Kälin ha mussà quasi en tut las set disciplinas ina da las meglras prestaziuns insumma. E suenter sis da set disciplinas ha ella schizunt dastgà siemiar d’ina medaglia cun esser classada sco terza. Mo malgrà in meglier temp persunal en la davosa cursa da currer sur 800 meters (2:11,33 minutas), ha ella anc stuì laschar surpassar Noor Vidts da la Belgia che vala sco la meglra curridra sur questa distanza. Per bronz han la finala be 68 puncts mancà a la megliera sportista grischuna a quests gieus olimpics da stad. Mo cun total 6'639 puncts ha Annik Kälin battì ses agen record svizzer d’avant dus onns a Minca per 124 puncts.
Betg stada da franar è ina giada dapli Nafissatou Thiam da la Belgia (6'880 puncts). Ella è daventada a Paris per la terza giada campiunessa olimpica en il heptatlon. Argient gudogna Katarina Johnson-Thompson da la Gronda Britannia cun in dischavantatg da 36 puncts.
Er en il Partenz han ils fans persequità Kälin durant il final
A Fanas è venderdi saira vegnì persequità il gieus olimpics plain tensiun durant il public viewing. Da giuven fin vegl, tuts che han tegnì ils poleschs per Annik Kälin. Era il tat dad ella -probabel ses pli grond fan- ha prendì part al public viewing.
Quai è bellischem da vesair la biadia tranter las meglieras dal mund.
Era sch'i na betg tanschì per ina medaglia, fetschia el festa fin la damaun. Ed el na vegn betg esser stà il sulet. Tut ils fans en sala èn stads cuntents e plain luschezza. La medaglia d'olimpia resta pia anc in siemi per Annik Kälin. Dentant per in diplom hai tanschì, quai ch'è gia ina prestaziun nundetga.
Annik Kälin (24) – heptatlonista
Tgi che ha l’onur da dastgar sa participar a gieus olimpics na dovra normalmain nagina motivaziun supplementara. Sin Annik Kälin spetgass dentant in zutger tut spezial – en il cas ch’ella turnass a chasa cun ina medaglia. Il Club da hockey Partenz-Signuradi ha numnadamain empermess a l’atleta da Grüsch da midar il num da lur halla da glatsch en la «Annik Arena» sche quai daventa realitad.
L’atleta da 24 onns ha pudì sa preparar optimal sin quest punct culminant da l’onn. Ed ils problems cun il schanugl che han anc franà ella la primavaira, n'èn dapi il campiunadi europeic a Roma nagin tema pli. Ed il pli principal – la furma constat. Annik Kälin è ils davos onns s’etablida ad ina da las meglras otg heptatlonistas dal mund.
Nus avain atgnamain cumenzà cun l’atletica leva be ord plaschair – e mai siemià che nossa via mainia in di sin la tribuna olimpica.
William Reais (25) – sprinter
Gieus olimpics a fin gia suenter emprima runda
Per William Reais èn ils gieus olimpics a Paris a fin strusch che quels han cumenzà. Il sprinter da Cuira è vegnì en sia cursa d'eliminaziun, pia en l'emprima runda sur 200 meters be 7avel ed uschia davos. Per sa qualifitgar direct per il mezfinal avess Reais stuì sa classar tranter ils emprims trais. El na saja insumma betg sa sentì bain, el saja extrem stanchel, ha el ditg curt suenter la cursa en l'intervista cun SRF.
Ord questa raschun è Reais pli tard er sa decidì da turnar a chasa e betg pli ir a la partenza da la cursa da requalificaziun, il uschenumnà «Hoffnungslauf» nua ch'el vess anc gì in di pli tard ina segunda schanza da tuttina anc far il pass en il mezfinal sco gia als davos gieus olimpics avant trais onns a Tokyo. «En mia situaziun actuala na fai nagin senn da currer in'ulteriura cursa. Avant ch'jau vom puspè a la partenza vuless jau l'emprim sclerir medicinalmain tge ch'è il problem», uschia William Reais paucas uras suenter sia cursa disgraziada en il Stade de France a Paris avant ina culissa cun 70’000 persunas.
Als gieus olimpics cun la medaglia da bronz al campiunadi d'Europa
William Reais sa legra sin ses segunds gieus olimpics. Tar sia premiera avant trais onns a Tokyo veva il sprinter da Cuira cuntanschì il mezfinal en il sprint da 200 meters, sia disciplina da parada. Questa finamira vul Reais er cuntanscher a Tokyo, malgrà che ses meglier temp sur questa distanza (20,24 sec.) schai gia prest quatter onns enavos. Dapi bun in onn è ses lieu central da trenament a Berna. Là ha el er pudì trenar en vista a Paris cun la sprintra Mujinga Kambundji.
Elena Hartmann (33) – ciclista
Elena Hartmann: «Quest temp na vegn jau mai ad emblidar»
![Elena Hartmann](https://www.rtr.ch/static/cms/images/960w/0c9d6e.jpg)
In'experientscha ed ina culissa tut speziala
Per la ciclista rumantscha oriunda da Domat èn ils gieus olimpics da stad a Paris a fin. Suenter la cursa cunter l’ura avant in’emna è Elena Hartmann era sa participada a la cursa da via. La ciclista da 33 onns ha cuntanschì l’arrivada sco 57avla cun in retard da bunamain 9 minutas sin la campiunessa olimpica, l’Americana Kristen Faulkner. In diplom svizzer hai dà per Noemi Rüegg ch’ha terminà la cursa sco setavla.
Elena Hartmann manchenta in diplom olimpic
La ciclista oriunda da Domat che viva dentant dapi onns a Baar en il chantun Zug è vegnida 17avla en sia emprima cursa olimpica, la cursa cunter l'ura ch'ha manà sur 32,4 kilometers tras la citad da Paris. Sco anc bleras concurrentas ha era Hartmann gì da cumbatter cun las grevas relaziuns. Pervia da la plievgia èn numnadamain pliras ciclistas cupitgadas, uschia era la Grischuna ch'ha cumenzà pir avant bun dus onns ad ir professiunalmain cun velo.
Gudagnà la cursa ha a moda suverana Grace Brown. L'Australiana che veva sco quarta manchenta be piz a cup ina medaglia als davos gieus olimpics a Tokio – è stada passa ina minuta e mez pli sperta che Anna Henderson da la Gronda Bretagna e l'Americana Chloe Dygert.
Elena Hartmann: «Jau na crai anc adina betg che sun qua»
Las davosas bun duas emnas avant ils gieus olimpics èn stadas pulit turbulentas en la vita d’Elena Hartmann, la ciclista da 33 onns oriunda da Domat che viva dentant a Baar en il chantun Zug. Pir dacurt è ella vegnida nominada per Paris, quai per Marlen Reusser che patescha gia dapi in temp d’in virus e che sto uschia star a chasa.
La Grischuna è vegnida nominada dal trenader naziunal Edi Telser, quai er grazia a sias bunas prestaziuns dal davos temp. Quest onn è Elena Hartmann vegnida per la terza giada en roda campiunessa svizra en la cursa cunter l’ura. Plinavant ha ella persvadì cun in 6avel plaz a la cursa cunter l’ura al Giro d’Italia, ses emprim plaz sut las top 10 tar ina cursa da la World Tour.
Jau n’hai mai siemià d'astgar parter ina giada a gieus olimpics.
A Paris parta Elena Hartmann uss anc a la cursa da via, che ha lieu ils 4 d'avust. Fin lura vegn ella a bandunar il vitg olimpic a Paris – per trenar cun ses team ordaifer la chapitala franzosa.
Atgnamain aveva Elena Hartmann, che lavura dasper il sport anc en in pensum parzial da 20% tar la polizia chantunala da Turitg, planisà da far in pausa sportiva il proxim temp suenter ch’ella è partida quest onn al Tour de Suisse, als campiunadis svizzers ed al Giro d’Italia. Quest plan ha ella uss dentant stuì metter sin il chau.
Quasi da 0 sin 100
Cun questa nominaziun per ils gieus olimpics da stad a Paris cuntinuescha l’istorgia extraordinaria d’Elena Hartmann. Pir avant bun dus onns aveva l’anteriura triatleta da hobi midà sin il sport da velo. Gia tar sia emprima partenza als campiunadis svizzers avevi dà aur. Sinaquai er’il trenader naziunal Edi Telser s’annunzià tar la sportista grischuna. Gia in onn pli tard è Hartmann ida a la partenza al campiunadi d’Europa sco er al campiunadi mundial. Cun ses 33 onns manca a Hartmann bain in zic l’experientscha e la tecnica, gist en ina cursa cun partenza en massa. Ses grond avantatg è dentant ch’ella emprend fitg spert, ch’ella è, en cumparegliaziun cun autras atletas en questa vegliadetgna, fitg frestga e ch’ella è mental fitg ferma.