Igl è il siemi da mintga sportist, d'in bel di pudair ir a gieus olimpics. A Paris va quest siemi en vigur per Annik Kälin. Ella è l'emprima giada part da la gronda famiglia olimpica da Swiss Olimpic. E la heptatlonista da Grüsch furma era gist la pli gronda delegaziun ch'il Grischun ha gì insacura a gieus olimpics da stad. Cun ella ha er Elena Hartmann da Domat premiera olimpica sin ses velo da cursa. Ella è pir dacurt vegnida nominada, suenter che Marlene Reusser sto desister pervia da problems da sanadad. Il quartet grischun vegn cumplettà cun il mountainbiker Nino Schurter ed il sprinter William Reais.
Igl è il pli grond en mia carriera – grev da s'imaginar con gigantic ch'i vegn.
La premiera ed aventura olimpica d'Annik Kälin cumenza pir vers la fin dals gieus che vegnan averts ils 26 da fanadur. Las set disciplinas dal heptatlon èn repartidas sin ils 8 e 9 d'avust. L'emprim di ils 100m obstachels, sigl en aut, bittar la culla ed il sprint da 200m. Il segund di spetgan il sigl en lung, trair la lantscha e per finir currer ils 800m.
Annik Kälin è ida pass per pass adina in zic pli lunsch e pli aut. Ella è s'etablida magari svelt en il ravugl da las meglras heptatletistas dal mund. Gist a ses emprim campiunadi mundial d'atletica leva cun l'elita – l'onn 2022 en ils Stadis Unids da l'America – vegn ella 6avla. Il medem onn gudogn'ella sensaziunalmain la medaglia da bronz al campiunadi europeic a Minca. Meglierescha ses agen record svizzer per passa 50 puncts sin total 6'515 puncts. Ed era al campiunadi europeic, quest onn a Roma, ha ella persvadì cun ses quart plaz en il heptatlon. Era persvadì ha ella en la disciplina singula dal sigl en lung, nua ch'ella ha cun 6,84m realisà in nov record svizzer ed è sa tschentada sin il 6avel plaz.
Cool co tut è sa sviluppà – ils gieus olimpics èn insanua la consequenza logica.
Annik Kälin vegn dapi adina trenada da ses bab Marco, ch'è era medi – in duo che funcziuna, harmonescha e sa cumplettescha. Surtut era en quels muments cura che problems cun il dies han franà ella per pli lung temp avant trais onns. L'onn passà èsi stà ina blessura vi dal schanugl ch'ha sfurzà ella da desister sin concurrenzas e campiunadis. Il proceder cun betg sfurzar e dosar ils trenaments, propi dar peda ed avair pazienza, è sa pajà. Quest onn il mars – al campiunadi mundial en halla – manchenta ella be per 3 centimeters la medaglia en il sigl en lung. Il matg – al meeting da heptatlon a Götzis – brigliescha l'atleta da 24 onns. Cun 6'506 puncts ha ella surpassà ed ademplì la limita per ils gieus olimpics a Paris. Sco Annik Kälin raquinta, saja ella sezza stada in pau surpraisa da quellas prestaziuns e che tut funcziunia gist uschè bain, suenter ils problems cun ses schanugl.
Il siemi olimpic realitad – in diplom olimpic realistic
En ses stretg conturn na saja sia qualificaziun per ils gieus olimpics betg stada uschè ina gronda surpraisa. Ins quintava che quai gartegia baud u tard suenter ses progress e success als campiunadis d'Europa e mundials. Insanua ina consequenza logica en sia carriera da sport. Annik Kälin punctuescha dentant, che quai na sa chapeschia betg da sez. Il nivel tar l'elita da heptatlon saja fitg aut, surtut en l'onn olimpic.
L'atleta da Grüsch, ch'è dentant è fisioterapeuta, avess era pudì parter be en il sigl lung a Paris. En quella disciplina singula avev'ella er ademplì la limita. Sia gronda passiun saja e restia il heptatlon. Avair sur dus dis 7 schanzas en 7 differentas disciplinas da mussar ses meglier. A ses emprims gieus olimpics vul Annik Kälin meglierar ses record svizzer. E sche quai gartegia, duess in plaz en las top 8 dal mund esser pussaivel. I dovria dentant top prestaziuns. Sch'i gartegi da turnar en patria cun in diplom olimpic, fiss ella enorm ventiraivla e superbia.
I dovra success per tegnair la dira. Ils gieus olimpics èn er ina sort pagaglia per tut quai ch'ins sto desister.
Sieglinde Cadusch da Cuira è stada l’ultima atleta grischuna a gieus olimpics da stad. La spezialista dal sigl en aut ha gì sia premiera olimpica l’onn 1992 a Barcelona e l’onn 1996 è ella stada ad Atlanta. Sco ella raquinta, guardond enavos, è ella stada surpraisa da las dimensiuns. Tut la truscha, ditg avant ils gieus, hajan irrità ed impedì da sa focussar. Sportiv èn ils gieus olimpics stads ina trumpada. Ella, che tutgava ils onns 90 tar l’elita mundiala schlargiada, n’ha betg pudì clamar giu ses potenzial. Surtut betg als gieus ad Atlanta, nua ch’ella aveva ina top furma e dacurt gì realisà il nov record svizzer dad 1,95m. Ella stat pendida en la qualificaziun, ses frust enorm.
Sieglinde Cadusch ha vivì per l’atletica leva ed ha è pudì viver da ses sport. Magari spezial per quest temp. Mussament per la carriera extraordinaria da la Grischuna, che ses record svizzer en il sigl en aut è pir vegnì battì l’onn 2022. E fin ch’ina Grischuna remplazza ella a gieus olimpics da stad hai durà 28 onns.
