- Il parsura da la baselgia catolica è mort cun 88 onns – el è daventà il segund pli vegl papa da l'istorgia.
- Il papa è mort d'in culp cun in'insuffizienza dal cor, quai ha il Vatican communitgà la saira suenter sia mort.
- Dumengia da Pasca aveva papa Francestg anc dà la benedicziun tradiziunala «Urbi ed Orbi».
- Plirs mais ha il pontifex argentin patì d'ina infecziun da la via respiratorica cun differents virus.
- Papa Francestg è stà 38 dis en la clinica Gemelli a Roma per tractar sia malsogna, el era vegnì relaschà ils 23 da mars or da l'ospital.
- Da mesemna fin venderdi pon cartentas e cartents prender cumià dal papa.
- La sepultura è sonda, ils 26 d'avrigl.
La correspondenta da SRF da l'Italia, Simona Caminada, è a Roma e descriva la situaziun. Tenor ella haja blera glieud sin la plazza da Son Peder, ins na vesia uschiglio dentant anc nagut spezial. En il proxim temp quinta ella cun anc dapli visitaders e visitadras. Pervi da Pasca sajan gia blers turists e pelegrinas a Roma. Quai vegnia anc a s'augmentar ils proxims dis.
12 onns en uffizi
Papa Francestg ha cumenzà ses uffizi ils 13 da mars 2013 ed è succedì a Papa Benedetg XVI. ch'è mort da Silvester 2022 en la vegliadetgna da 95 onns. Enconuschent è l'um oriund da l'Argentina vegnì per sia tenuta progressiva en dumondas socialas e dumondas da la baselgia. Papa Francestg ch'ha num Jorge Mario Bergoglio è stà l'emprim papa da l'America latina. Ses temp d'uffizi è stà marcà da tensiuns tranter aderentas ed aderents da refurmas ed ils circuls conservativs da la baselgia.
Frars e soras, buna saira. Sco che vus savais, èsi l'obligaziun dal conclave da dar a Roma in uvestg. Sco ch'i para èn mes frars cardinals ids quasi fin a la fin dal mund per survegnir el.
Grev infect dal lom
L'emprim di che papa Francestg è stà en la clinica a Roma avevi anc num davart dal Vatican, ch'el pateschia d'ina bronchitis. Glindesdi, 17 da favrer, èsi lura vegnì communitgà ch'i sa tractia d'in «maletg da malsogna cumplex», numnadamain d'ina infecziun da la via respiratorica. Quai munta che differents patogens – ch'èn grevs da cumbatter – han gia s'etablì en il nas, en la gula ed en il lom. Dasper virus pon era bacterias, bulieus u parasits esser la culpa da l'infecziun.
Er avant il 2025 aveva papa Francestg gì da far cun la sanadad. La stad dal 2023 aveva il parsura catolic per exempel stuì ir en l'ospital per laschar operar vi dal venter. La raschun per l'operaziun era ina natta rutta en la regiun dal begl. Papa Francestg era dentant sa revegnì bain da l'operaziun.
Tgi elegia il nov papa?
Sch'i vegn fim alv or da la chapella sixtina vul quai dir: in nov papa è elegì. Per che quai succeda sa radunan ils cardinals, ch'èn sin tut il mund, en il Vatican per eleger. Davos portas serradas pon quels eleger lur candidat sco successur da papa Francestg. En vista a l'influenza enorma ch'in papa ha internaziunalmain, ha l'elecziun ina muntada fitg gronda per il mund catolic.
Sco favurit per la successiun da papa Francestg vala per blers il cardinal talian Pietro Parolin. Il spiritual da 70 onns ha assistì a papa Francestg gia dapi var 10 onns sco secretari dal stadi cardinal. Là era Parolin responsabel per la diplomazia internaziunala.
Igl è dentant fitg grev da prevesair la decisiun da la proxima elecziun, perquai ch'i ha uschè blers cardinals novs en il conclave.
L'elecziun cumenza 15 fin 20 dis suenter la mort u demissiun da l'anteriur papa ed ha lieu en furma d'in uschenumnà conclave – vul dir ch'ils cardinals sa rimnan en ina stanza da la chapella sixtina ch'è strictamain serrada per il public. Prender part a l'elecziun dastgan dentant mo cardinals sut 80 onns. La finamira èsi, sche pussaivel, d'adina avair circa 120 cardinals che dastgan eleger il nov papa. Ils cardinals èn cumplettamain isolads dal mund exteriur – per evitar ch'els vegnian influenzads. Là restan els fin ch'igl èn d'accord tgi che duai daventar il nov parsura da la baselgia catolica. Durant quest temp n'èsi betg lubì als cardinals d'avair contact cun persunas ordaifer dal conclave. Era gasettas, televisiuns e radios èn scumandads.
Memorias or da l'archiv
Contribuziuns e controversas
Jau siemiel d’ina Europa nua che ses engaschament per ils dretgs umans n'è betg stà il davos punct da sias visiuns.
Jau vi accentuar cleramain: Sch’ins chatta en la baselgia er mo in cas d’abus – quai ch’è en sasez gia orribel – vegn quest cas prendì per mauns cun la pli gronda seriusadad.
Far refurmas a Roma è sco da nettegiar la Sphinx egipziana cun in barschun da dents.