Cun l'elecziun da papa Francestg il 2013 haja ella percurschì speranza, speranza che la baselgia metta en il center il carstgaun e giaja en il dialog, quai di la teologa Flurina Cavegn-Tomaschett. Papa Francestg haja lura er vivì quai ch'el haja predegià – el n'haja betg be ditg ch'el giaja tar ils carstgauns a l'ur, el haja er fatg quai.
«Visiun ch'il papa po muentar dapli per las dunnas»
Flurina Cavegn-Tomaschett vesa il process sinodal, ch'ha la finamira da far la baselgia pli participativa, sco gronda ierta da papa Francestg. La gronda dumonda saja uss dentant co che quest process giaja vinavant. Papa Francestg haja plinavant enfin in tschert punct pudì far ina punt tar las dunnas. La teologa ch'è collavuratura pastorala ha gì gronda speranza ch'il papa vegnia da muentar dapli per il servetsch da las dunnas en baselgia. I na saja dentant betg stà pussaivel da far dapli. El haja dentant laschà tiers il discurs davart il diaconat da la dunna en la baselgia catolica – sur plirs decennis saja questa tematica stada in tabu. Plinavant haja papa Francestg er mess en dunnas en differents posts, quai valitescha Flurina Cavegn-Tomaschett sco novum ch'ins na dastgia betg emblidar.
«In papa curaschus»
La nova da la mort da papa Francestg saja stada surprendenta, di l'uvestg da Cuira Joseph Maria Bonnemain. El haja en sasez sperà ch'il parsura da la baselgia catolica possia anc muentar intgins onns insatge e cuntinuar il process sinodal ed uschia s'avischinar anc pli fitg a la glieud. Papa Francestg saja stà in papa curaschus che saja ì tar quellas e quels ch'èn a l'ur da la societad. Ir tar la glieud sco quai ch'il papa fascheva, uschia stoppia la baselgia cuntinuar. L'uvestg da Cuira spera fermamain che il proxim pontifex persequiteschia decididamain la lingia da papa Francestg.
