Il successur vegn tschertgà: Suenter il funeral da Papa Francestg èsi d'eleger in successur. Dretg d'eleger han ils cardinals che n’han anc betg 80 onns. Tenor indicaziuns actualas èn quai 135. In ha però dà giu ses viadi a Roma per motivs da sanadad. Dus cardinals vegnan da la Svizra, Kurt Koch ed Emil Paul Tscherrig. Ensemen cun ils auters cardinals cun dretg d’eleger vegnan els ad eleger il papa nov.
Conclave: Pli baud durava quai mintgamai emnas fin ch'ils cardinals da tut il mund eran viagiads a Roma. Ozendi è quai pussaivel entaifer paucs dis. Per regla cumenza in conclave 15 fin 20 dis suenter la mort dal papa. L'elecziun vegn fatga davos portas serradas en la chaplutta sixtina en il Vatican.
Ils cardinals èn cumplettamain isolads dal mund exteriur – per evitar ch'els vegnian influenzads. Là restan els fin ch'igl èn d'accord, tgi che duai daventar il nov parsura da la baselgia catolica. Durant quest temp n'èsi betg lubì als cardinals d'avair contact cun persunas ordaifer dal conclave. Era gasettas, televisiuns e radios èn scumandads. Quest entir proceder d'elecziun vegn numnà conclave.
Fim nair u alv: suenter mintga scrutini communitgeschan ils cardinals cun segns da fim sch'els han gia elegì in nov papa. Fim nair vul dir: anc nagin n'ha cuntanschì la maioritad necessaria da dus terzs. Fim alv percunter mussa: l'elecziun ha gì success. Savens dovri numerus scrutinis ed in conclave po cuzzar paucas uras fin a plirs dis u schizunt emnas. Ina limita da temp na datti betg. Ils ultims dus conclaves il 2002 e 2013 han mintgamai cuzzà dus dis.
Nov papa cumpara sin la plazza da Son Peder: Tgi ch’è il nov Pontifex Maximus, vegn il mund a savair live sin la plazza da Son Peder, curt suenter sia elecziun. Sin la loggia (il balcun) da la baselgia da Son Peder cumpara il nov elegì gia en il vestgì papal. El vegn annunzià cun ils pleds latins: habemus papam – nus avain in papa.
Sco favurit per la successiun da papa Francestg vala per blers il cardinal talian Pietro Parolin. Il spiritual da 70 onns ha assistì a papa Francestg gia dapi var 10 onns sco secretari dal stadi cardinal. Là era Parolin responsabel per la diplomazia internaziunala.
Igl è dentant fitg grev da prevesair la decisiun da la proxima elecziun, perquai ch'i ha uschè blers cardinals novs en il conclave. Gia cler è però che Parolin vegn a manar il conclave.